Si Provincial Governor Jose Ma. R. Zubiri, Jr. mihimo sa pagpaabot sa mga importanteng hisgutanan atol sa iyang unang meeting sa mga Department/Division Heads ug mga Chief of Hospitals alang sa tuig 2021 kaniadtong Enero 7, 2021 sa Kaamulan Open Theater, syudad sa Malaybalay, Bukidnon.

Press Release No. 2 | January 7, 2021

MIPATAWAG sa unang meeting sa tuig 2021 si Bukidnon Provincial Governor Jose Ma. R. Zubiri, Jr. ngadto sa mga Department/Division Heads ug mga Chief of Hospitals sa walo (8) ka mga Provincial Hospitals bag-ohay pa lamang, Enero 7, 2021 didto sa Kaamulan Open Theater, Kaamulan Park, Malaybalay City, Bukidnon.

Gidayeg ni Gov. Zubiri ang mga Department/Division Heads ug mga empleyado gumikan sa pagsuporta sa iyang administrasyon sugod sa iyang pagka-gobernador ug mga nahimong sakripisyo ug paningkamot niini nga mapadayon ang maayong pagserbisyo sa katawhan. Gumikan niini, gipasigarbo sa gobernador nga gikan sa ikatulo (3) nga pinaka-kabus nga probinsya, nahimo kini nga ikalima (5) nga pinakadatu nga probinsya sa tibuok nasod.

Gipasalamatan usab sa gobernador ang mga Chief of Hospitals sa probinsya ug sa mga lumilihok niini aron makontrolar ang pagkuyanap sa COVID-19 sa atong probinsya. Sa nahimong update ni OIC-Provincial Health Officer Dr. Gary Guido C. Tabios, Jr. nga adunay 42 ka kaso ang natala nga natakbuyan sa COVID-19 (datus panahon sa meeting) diin nag-una niini ang dakbayan sa Valencia ug nagsunod ang mga munisipyo sa Manolo Fortich ug San Fernando.

Sa maong tigum, gipresenta usab ni Gov. Zubiri ang iyang mamahimong mga plano ug programa karong tuiga alang sa kaayuhan ug kaarangan sa pamuyo sa katawhan, ilabi na sa mga pinaka-kabus nga hut-ong sa katilingban. Wala usab gikalimtan sa gobernador ang sakripisyo sa mga opisyal ug empleyado sa Kapitolyo Probinsyal, rason nga ubay-ubay sa mga pag-ila ug pasidungog ang nakab-ot ug naangkon sa Kagamhanang Probinsyal. Tungod niini, ginalantaw ni Gov. Zubiri nga madugangan ang mga kaayuhan ug mga benepisyo sa mga empleyado ilabi na ang seguridad sa pagpanarbaho niini.

Gidaseg ni Gov. Zubiri ang tanang mga Department/Division Heads ug ang mga Chief of Hospitals nga mamahimong maayong ehemplo ngadto sa ilang mga empleyado ug ipabilin ang maayong dungog sa kapitolyo, ilabi na ang dedikasyon sa trabaho. Mopatawag usab si Gov. Zubiri ug panagtigum sa matag opisina sa mosunod nga mga semana aron ma-presenta niini ang ilang mga plano ug programa alang sa kasamtangang tuig sa ilang tagsa-tagsa ka departamento ug opisina.

Sa katapusan, gibutyag ni Gov. Zubiri nga sa iyang nahabilin nga pila ka tuig sa pagserbisyo isip gobernador sa probinysa, gusto niining mapabilin ang iyang maayong mga legasiya diin gilauman niini nga pagasundon sa mopuli kaniya.

###