Gidasig sa Provincial Agriculture Office, pinaagi sa Farmer’s Information and Technology Services, ang tanang katawhan sa probinsya sa Bukidnon sa paghimo sa container gardening sa ilang tagsa-tagsa ka panimalay aron makatanum sa mga utanon ug lagutmon, ilabi na sa mga walay luna nga katamnan sa ilang mga tugkaran.

Press Release No. 8 January 13, 2021

GIDASIG sa buhatan sa Bukidnon Provincial Agriculture’s Office, pinaagi sa FITS Bukidnon – Farmer’s Information and Technology Services, sa pagpanguna ni Provincial Agriculturist Alson G. Quimba ang tanang katawhan sa probinsya sa paghimo ug container gardening sa ilang tagsa-tagsa ka panimalay. Tumong niini nga makatabang sa katawhan nga makatanum ug mga utanon ug lagutmon, ilabi na sa mga walay luna nga katamnan sa ilang mga tugkaran.

Sa impormasyon nga gipadangat ni Asst. Provincial Agriculturist Ms. Jacqueline Julia Lagamon nga ang container gardaining usa ka pamaagi nga pagpananom ug mga utanon sa mga container nga wala na gigamit imbes nga sa yuta diin pwede kining ipatong ug ibitay sa ilang koral, dingding o haligi sa ilang mga panimalay. Lakip sa mahimong tamnan ang kaang, walay sulod nga plastic ug botelya, kawayan, plastic nga tubo, karaan nga ligid, plastik bags, tower planters, hanging pots, walay sulod nga mga containers, galon ug sudlanan, bunot sa lubi ug uban pang pwede masudlan nga wala na gigamit.

Dugang usab ni Lagamon nga dako kini ug ikatabang ngadto sa mga katawhan niining panahon sa pandemya ilabi na sa mga kabus nga pamilya ug mga nawad-an ug trabaho nga adunay makuhuwaan sa pagkaon. Ang container gardening luwas nga kan-on ug maayo sa panglawas kay ang nagtanom mismo ang maka-monitor ug mag-alima sa iyang pananom nga walay kemikal nga ibutang.  Usa sa mga bentaha niini ang kasayon, kalimpyo, katahom, pagkaanaa, kasayon sa pagpamisbis ug labing dako nga pagamit sa luna.

Ang buhatan sa Provincial Agriculture magpahibalo lamang kung aduna nay schedule alang sa libreng training and seminar alang sa mga gustong makakat-on sa mga pamaagi sa container gardening. Available pa usab diha sa maong buhatan ang libre nga binhi sa mga utanon. Sa mga intresado pwede silang mobisita sa Provincial Agriculture’s Office nga nahimutang sa Provincial Capitol Compound, Malaybalay City, Bukidnon o tawag sa telepono numero 088-813-5616, o email sa agribukidnon@gmail.com o kaha bisita sa ilang facebook page nga FITS Bukidnon – Farmer’s Information and Technology Services.

###