Press Release No. 7 | January 13, 2021

NAGPADAYON ang buhatan sa Provincial Agriculture’s Office sa pagpanguna ni Provincial Agriculturist Alson G. Quimba sa pag-display sa mga baligya sa mga organically grown products o organikong produkto panahon sa Market Day matag adlaw’ng Huwebes ug Biyernes sa ilang buhatan sa Provincial Capitol Compound, Malaybalay City, Bukidnon sa alas 10:00 sa buntag hangtud alas 5:00 sa hapon.

Matud pa ni Ms. Emma C. Ravelo, Supervising Agriculturist nga lakip sa mga organikong produkto nga baligya ang mga homemade products, mga utanon ug prutas sama sa radish, string beans, kangkong, talong, kalabasa, sayote, patatas, luy-a, ahos, okra, bisaya nga manok, gabi, saging kardaba, saging tondan, corn wine, sinamak, peanut butter, turmeric health drink, fresh milk, buko juice, mani, kape namalit ug daghan pang uban.

Dugang usab ni Ms. Jacqueline Julia Lagamon, Assistant Provincial Agriculturist nga makagarantiya sila nga organic ug wala’y sagol nga kemikal ang mga gipangbaligya nga produkto gumikan kay kini gina-monitor pinaagi sa participatory guarantee system nga gipahigayon sa Sto. Niño Organic Rice Farmers Association. Gawas niini, ang mga utanon bag-ong ani, luwas ug walay sagol nga delikadong kemikal, maayo sa panglawas, makapaayo sa kondisyon sa kasing-kasing, makapakusog sa immune system, makaminus sa mga sakit nga bunga sa mga kemikal sa pagkaon, ug makahatag ug panginabuhian sa mga lokal nga mag-uuma.

Alang sa dugang kasayuran, pweding mobisita sa buhatan sa Provincial Agriculture’s Office o kaha kontak sa mga musunod nga numero, 09359957681 o 09058036567 ug pangitaa si Ms. Maricon L. Ompoc ug Ms. Nimfa V. Carpina.

Hugot usab nga gisuportahan ni Bukidnon Provincial Governor Jose Ma. R. Zubiri, Jr. ang maong programa sa maong buhatan gumikan kay dako kini ug ikatabang sa atong lokal nga mag-uuma sa probinsya ilabi na sa mga pinakakabus nga hut-ong sa katilingban.

###