Press Release No. 9 | January 14, 2021
GIHINGUSGAN ni Bukidnon Provincial Governor Jose Ma. R. Zubiri, Jr. nga prioridad niya nga pagatutokan ang pagmugna ug mga programa ug proyekto nga maghatag-sulbad sa kapobrehon sa probinsya sulod sa iyang nahibiling termino isip amahan sa Bukidnon.
Sa gitagana nga oras alang sa gobernador sa mga miyembro sa 26th Sangguniang Panlalawigan, atol sa ika-73 nga Regular Session nga gipangunahan ni Provincial Vice Governor Rogelio N. Quiňo, giaghat niini ang mga kaubanang opisyal nga ubanan siya sa pagpangita ug pamaagi nga kahatagan ug sulbad ang kapobrehon sa katawhan, pinaagi sa pagpanday ug mga balaodnon nga magtutok sa mamahimong programa ug proyekto nga maghatag kaarangan sa panginabuhi sa katawhan.
Subay niini, plano sa gobernador nga ipahigayon ang laing hugna sa pagpanghatag sa libreng binhi sa mais, ingon man abono ngadto sa pinaka-kabus nga mag-uuma ug ang paghatag ug ayuda sa mga pinaka-kabus nga pamilya sa probinsya. Sulod sa termino ni Governor Zubiri, basi sa data gikan ni Provincial Budget Officer Fe C. Retuertas gikan sa tuig 2017 hangtud 2019, mikabat na sa ₱796,774,700.00 ang pondo sa probinsya nga nagamit alang sa mga oportunidad sa panginabuhian alang sa mga kabus nga pamilya kung aha nang-apod-apod sa libreng corn seeds and fertilizers, ubos sa Economic Services nga Pillars of Good Governance ni Governor Zubiri.
Sa milabay nga pagpang-apod-apod sa libreng corn seeds and fertilizers, gibutyag ni Provincial Agriculturist Engr. Alson G. Quimba ang usa ka ektarya nga gipanag-iyahang yuta sa mag-uuma sa mais makadawat sa 18 kg of seeds ug 4 bags of fertilizer samtang kadtong adunay ubos sa usa ka ektarya, makadawat sa 9 kg of seeds ug 2 bags of fertilizer.
Mapasigarbuhon usab nga gipahinumdum ni Governor Zubiri sa mga kaubanang opisyal ang kalampusan sa iyang pagdumala sa probinsya isip gobernador. Sa iyang pagsugod, anaa ang Bukidnon sa 3rd poorest province sa nasud ug sa tuig 2015 nahimutang kini sa 6th poorest province, apan basi sa gimantala sa Philippine Daily Inquirer, pinitsahan Oktobre 17, 2019, ang Bukidnon nahimo nang 5th richest province sa nasud alang sa tuig 2018 nga Commission on Audit (COA) Audited Financial Report nga na-publish usab sa website sa maong ahensya, sa hisgutanan sa total assets sa probinsya. Dinhi natala sa Bukidnon ang ₱15.27 billion isip 5th richest province sa Pilipinas ug nag-una dinhi ang Cebu nga adunay ₱35.65 billion, basi sa data gikan kang Provincial Planning and Development Coordinator Engr. Jesrel B. Mangubat, EnP.
Gibutyag sa gobernador nga bisan pa man sa maong kalambuan, makita gihapon sa pipila ka mga pamilya ang kalisdanan, rason nga buot niining igahin ang nahibilin niyang panahon, isip gobernador, ang pagtukod ug mga programa ug proyekto nga mahimong tubag sa kapobrehon, uban ang suporta sa mga miyembro sa Sangguniang Panlalawigan.
###
