Mga personahe sa Provincial Treasurer’s Office sa ilang gihimo nga field works alang sa Real Property and Sand and Gravel inspection.

Press Release No. 10 | January 14, 2021

GIPAHINUMDUM sa Provincial Treasurer’s Office (PTO) ang tanang nanag-iya ug real properties, mga professionals, mga kompanya ug uban pa alang sa schedule sa pagbayad sa buluhisan alang ning tuig 2021 nga bayran kini sa tukmang panahon aron malikayan ang multa, interes ug dugang bayad sa buluhisan.

Base sa sulat-pahibalo nga gipadangat ni Provincial Treasurer Marilou S. Bueno, CPA, ang kadtong mga nanag-iya sa yuta, makinaryas ug dakbalay nga wala pa makabayad sa ilang Real Property Tax (RPT) alang sa tuig 2021, aduna pay 10% nga diskwento kutob sa Marso 31, 2021. Human sa maong petsa kung dili pa kini mabayran, aduna nay 25% nga surcharge sa buluhisan, dugang pa dinhi ang interest nga 2% kada bulan, pinasikad sa naaprubahang Provincial Ordinance No. 2013-004R(12th SP) o ang Provincial Revenue Code of Bukidnon.

Giklaro sa buhatan sa PTO nga kung dili kini mabayran sulod sa usa ka tuig, makunsidera na kining delinkwente. Kung dili makaya nga bayran ang RPT kada tuig, mamahimo usab kining bayran matag quarter. Sa 1st quarter, sa March 31; 2nd quarter – June 30; 3rd quarter – September 30; ug 4th quarter – katapusang adlaw ting-trabaho sa Disyembre.

Ang mosunod, mao ang schedule of payments sa uban pang matang sa buhis: Franchise Tax-pagabayran sa unang 20 ka adlaw sa bulan sa Enero nga kung dili mabayran sa tukmang panahon, adunay 25% nga surcharge ug 2% interest matag bulan; Amusement Tax-bayran sa unang 20 ka adlaw sa sunod bulan nga sila gitakda nga angayang magbayad, kung dili matukma ang pagbayad, adunay 25% nga surcharge ug 2% interest matag bulan; ug ang Tax on Delivery Trucks/Vans-bayran sa unang 20 ka adlaw sa bulan sa Enero ug kung dili matukma ang pagbayad, adunay 25% nga surcharge ug 2% interest matag bulan.

Sa nanganlang mga buluhisan, aduna lamang sharing of taxes ang RPT ug ang Amusement Tax. Sa sharing sa RPT (100%), 25% – sa barangay, 40% – syudad/lungsod ug 35% – sa province; samtang sa Amusement Tax sharing, 50% sa syudad/lungsod ug 50% sa province.

###