Press Release No. 12 | January 15, 2021

NAGPABILIN nga anaa sa ika-lima nga pinaka-labing adunahan nga probinsya ang Bukidnon sa tibuok nasud Pilipinas, sumala sa bag-o lang nigawas nga Commission on Audit (COA) 2019 Annual Financial Report.

Sa kasayuran nga gimantala sa PhilStar Global online news, ang Bukidnon nagpabiling anaa sa ika-lima nga wealthiest province sa nasud kung aha nakatala sa ₱18.294-billion pesos nga total assets, base sa Commission on Audit (COA) Financial Report nga na-publish usab sa website sa maong mantalaan.

Nakasulod sa top-10 wealthiest provinces sa nasud alang sa 2019 ang mga mosunod: 1. Cebu nga adunay total assets nga ₱203.900-Billion; 2. Batangas-₱20.793-Billion; 3. Rizal-₱20.275-Billion; 4. Davao de Oro-₱20.099-Billion; 5. Bukidnon-₱18.294-Billion; 6. Surigao del Norte-₱16,684-Billion; 7. Negros Occidental-₱15.901-Billion; 8. Leyte-₱13.540-Billion; 9. Palawan-₱13.036-Billion; ug 10. Iloilo-₱13.034-Billion.

Gipasabot ni Provincial Account Ritchel R. Okit, CPA, MBA, REB, REA nga ilhanan (indicator) niini nga kalampusan sa Pangagamhanang Probinsyal mao ang total assets nga adunay tulo ka mga component, nga mao ang mga mosunod: Current Assets – sama  sa cash on hand, cash on bank, receivables ug investments; Property, Plant, Equipment – nga mao ang mga fixed assets sa probinsya; ug ang Other Assets –  kadtong mga kabtangan nga wala mahisakop sa Current Assets ug Property, Plant and Equipment.

Kini na ang ikaduha ka tuig nga anaa sa ika-limang pwesto isip pinaka-labing adunahan nga probinsya ang Bukidnon kung aha nakatala kini niadtong tuig 2018 sa ₱15.27-Billion nga total assets.

Sa data gikan sa Philippine Statistics Authority (PSA)-Bukidnon nga anaa sa ika-unom ang Bukidnon sa poverty incidence among families sa nasud niadtong tuig 2015 gumikan sa nasinati nga taas nga hulaw (El Niňo Phonomenon), diin usa sa pinaka-grabeng naapektuhan ang Bukidnon nga naila nga agricultural economy. Daghanang mga mag-uuma ang naapektuhan ug dakong damyos sa agrikultura ang natala. Gani, bisan ang supply sa tubig nga mainom dakong hagit sa maong mga panahon. Tungod niini, nabutang ang probinsya sa Cluster 1, ang gikunsidera nga usa sa pinakapobre nga probinsya sa survey sa PSA. Apan sa tuig 2018, sa paningkamot ni Governor Zubiri nga matabangan ang mga mag-uuma, nag-apod-apod kini sa libreng binhi sa mais ug fertilizer aron katabangan ang mga mag-uuma nga makabawi gikan sa dakong pilde sa ilang pagpanguma  ug ang padayong paghatag sa pinansyal nga ayuda sa pinaka-kabus nga mga pamilya diin niresulta nga ang Bukidnon nahiapil na sa Cluster 3 nga survey sa 2018 gikan sa Cluster 1 sa tuig 2015 nga pinaka-pobre sa natad sa poverty incidence among families, diin nag-anam-anam ug saka ang lebel niini padulong sa pinakasapian nga cluster, ang cluster 5.

###