Press Release No. 14 | January 18, 2021

DAKO ang kalipay ni Bukidnon Provincial Governor Jose Ma. R. Zubiri, Jr. sa bag-ong pasidungog nga naangkon sa probinsya isip ika-lima nga pinaka-labing adunahan sa nasud Pilipinas, atol sa gipahigayon nga Flag Raising and Seal of Good Local Governance (SGLG) Awarding Ceremony kaganihang buntag-Enero 18, 2021 sa Kaamulan Open Theater, syudad sa Malaybalay.

Gibutyag ni Governor Zubiri nga kini ang adlaw nga dili mahikalimtan sa tanan gumikan sa pag-ila  nga naangkon sa probinsya nga nakab-ot pinaagi usab sa pagtimbayayong sa matag usa diha sa hiniusa nga tinguha nga maalagaran ang katawhan sa Bukidnon.

Base sa Consolidated Statement of Financial Position, as of December 31, 2019 nga data gikan sa Provincial Accounting Office, ang ₱18,294,426,501.00 nga total asset sa Bukidnon nga nakapahimo niini nga ika-lima nga pinaka-labing adunahan nga probinsya mao ang mosunod: Current Assets nga gilangkuban sa Cash and Cash Equivalents, Receivables, Inventories, Prepayments and Deferred Charges, adunay kinatibuk-ang kantidad nga ₱5,743,154,517.00; Non-Current Assets nga naglakip sa Investments, Receivables, Prepayments and Deferred Charges, Property, Plant and Equipment, Biological Assets ug Intangible Assets nga adunay kinatibuk-ang kantidad sa ₱12,551,271,984.00.

Samtang sa record sa tuig 2018 diin unang naangkon sa Bukidnon ang pag-ila nga 5th Wealthiest Province sa nasud, sa Current Assets – nakatala kini sa ₱5,269,882,416.00 ug ₱10,008,949,066.00 sa Non-Current Assets, nga miresulta sa kinatibuk-ang total assets kantidad ₱15,278,831,482.00, dinhi adunay pagsaka sa kantidad nga sobra sa ₱3-Billion diin dako ang kontribusyon sa Property, Plant and Equipment.

Hugot ang pagpasalamat ni Governor Zubiri sa tanang miyembro sa Sangguniang Panlalawigan nga gipangunahan ni Vice Governor Rogelio N. Quiňo, mga department heads ingon man sa mga empleyado sa Pangagamhanang Probinsyal sa Bukidnon ug tungod niini, gipadayag sa gobernador nga talagsaon lamang ang opisyal ug empleyado sama sa gipakita sa mga mi-abag sa iyang pangatungdanan ug pagdumala sa probinsya. Positibong gilantaw sa gobernador nga sa sunod tuig, dako pa ang pagsaka sa total asset sa lalawigan diin maangkon ang tiunay nga kalambuan ug mas maila nga adonahan sa nasud ang Bukidnon.

###