Press Release No. 18 | January 20, 2021

MIDUYOG sa pagsaulog sa 25th Philippine National Autism Consciousness Week ang Kagamhanang Probinsya sa Bukidnon sa pagpanguna ni Provincial Governor Jose Ma. R. Zubiri, Jr. pinaagi sa Provincial Disability Affairs Division, sugod Enero 18 hangtud 24 ning tuiga.

Ang maong kasaulugan nahimong posible pinaagi sa Proclamation No. 711 of 1996 ni President Fidel V. Ramos aron madasig nga madawat, maatiman ug maalimahan ang mga adunay kabilinggan sa autism sa atong katilingban. Lakip sa kalihukan sa maong kasaulugan ning semanaha ang pag-promotar sa publiko ug pribadong sektor nga makahimo sa adunay kabilinggan sa autism nga mahatagan ug dignidad, mapanalipdan ang tawhanong katungod, makalihok nga gawasnon ug makahatag ug kalambuan.

Ang tema sa kasamtangang tuig nga “Pilipinong May Autismo: Kakaiba, Kasali, Konektado” nagtumong sa paghatag ug kasayuran sa katilingban sa katalagsaon sa mga Filipino nga adunay autism, ug malambigit sa pagpadayag sa ilang kaugalingon diha sa media mahitungod sa kalambuan sa tawhanong katungod, edukasyon, pagpangempleyo, ug sa uban pang kalihukan, diin mainitong silang gidawat diha sa mapinanggaon nga katilingban.  

Matud pa ni Provincial Disability Affairs Officer IV Dominador D. Libayao- Division Chief/ PGO-Persons with Disability Affairs nga miduyog ang Probinsya sa Bukidnon pinaagi sa paghatag ug kasayuran ug kahibalo ngadto sa mga katawhan mahitungod sa maong kasaulugan pinaagi sa pagbitay ug pagbutang sa mga streamers sa mga pampublikong lugar. Dugang usab niini nga ubay-ubay ang mga kalihukan nga nakahan-ay aron mahimong mabulukon ang pagsaulog sa National Autism Consciousness Week nga hugot nga gisuportahan ni Provincial Gov. Jose Ma. R. Zubiri, Jr., apan wala kini mahinayon gumikan sa pandemya sa COVID-19.   

###