Si Governor Jose Ma. R. Zubiri, Jr. uban ni Vice Governor Rogelio N. Quiňo sa ilang pagdawat sa pasidungog gikan sa Department of the Interior and Local Government (DILG), pinangunahan ni Provincial Director Carmelo Enrique Libot, CESO V, alang sa Seal of Good Local Governance (SGLG) sa tuig 2019, atol sa gihimong Flag Raising and SGLG Awarding Ceremony niadtong Enero 18, 2021 sa Kaamulan Open Theater, Kaamulan Park, syudad sa Malaybalay, Bukidnon.

Press Release No. 13 | January 18, 2021

GIHATAGAN sa pasidungog sa Department of the Interior and Local Government (DILG) ang Provincial Government of Bukidnon (PGB) sa Seal of Good Local Governance (SGLG) alang sa tuig 2019, atol sa gipahigayon nga Flag Raising and SGLG Awarding Ceremony kaganihang buntag-Enero 18, 2021 sa Kaamulan Open Theater nga gipangunahan ni DILG Provincial Director Carmelo Enrique B. Libot, CESO V.

Mapasigarbibuhon nga gidawat ni Provincial Governor Jose Ma. R. Zubiri, Jr. ang maong pasidungog dungan ang paghatag ug pagdayeg sa tanang opisyales, department heads ug mga empleyado sa mga nagkalain-laing buhatan sa Pangagamhanang Probinsyal sa mga paningkamot ug sakripisyo niini nga magserbisyo sa probinsya, diha sa paghatud ug pagtunol sa mga batakang serbisyo ngadto sa katawhan.

Subay sa DILG Memorandum Circular No. 2019-44, ang mga gitakda nga ilhanan (criteria) sa SGLG Award angayang matuman sa mga LGU diin tinguha sa nasudnong pangagamhanan nga maduso sila ngadto sa mas maayo nga kabag-ohan, ug dinhi mahibal-an ang maayong pagpadagan sa mga nangantungdanang opisyal diha sa interbensyon ug aksyon sa natad sa seven governance areas nga mao ang mosunod: 1. Financial Administration, base sa COA Audit Result, transparency ug ang maalamon nga pagamit sa pondo sa mga locally funded projects ug sa 20% Internal Revenue Allotment (IRA); 2. Disaster Preparedness, pinaagi sa katukoran sa Operation Center ug ang pagtudlo sa LDRRM Officer niini; 3. Social Protection, mga programa sa maayong panglawas, edukasyon ug uban pa; 4. Peace and Order, katukoran sa aktibo nga konseho niini; 5. Business Friendliness and Competitiveness, pinaagi sa mas dali ug mahingpon nga sistema sa pagkuha sa business permits ug uban pa; 6. Environmental Protection, katukoran sa 10-years Solid Waste Management Plan; ug ang katukoran sa functionality sa 7. Tourism Culture and the Arts, sigun ni DILG Provincial Director Libot.

Gawas niini nga kalampusan sa PGB, nakadawat usab sa susamang pasidungog ang mga Local Government Units (LGUs) sa Bukidnon nga mao ang Valencia City, Pangantucan, Kadingilan, Quezon, Impasugong, ug San Fernando.

Nadawat sa PGB uban sa mga ginganlang mga LGUs ang SGLG Marker, Performance Challenge Fund nga mopahigayon sa local government initiatives program [Province: ₱4.5-Million; City: ₱3.5-Million; ug Municipality: ₱2.3-Million], ug maka-benipisyo usab sa mga programa sa nasudnong pangagamhanan nga nag-require sa SGLG award.

Dungan nga gitunol ang Marker ug Special Award sa pipila ka mga LGUs sa lalawigan alang sa 2019 Anti-Drug Abuse Council (ADAC) Awards gumikan sa mapadayonon niini nga anti-drug clearing activity nga mao ang mga lungsod sa Pangantucan ug San Fernando, samtang midawat usab sa ADAC Special Award ang lungsod sa Kadingilan.

Gibutyag ni Governor Zubiri nga dili kalimtan sa tanan ang mao nga adlaw gumikan kay naangkon sa pangagamhanang probinsyal ang maong pasidungog nga nagmatuod sa tinud-anay ug kinasing-kasing nga pag-alagad sa katawhan.

###