Press Release No. 15 | January 19, 2021
NAKATAKDANG mang-apod-apod si Provincial Governor Jose Ma. R. Zubiri, Jr. sa dugang pondo alang sa kalambuan sa syudad ug lungsod sa Bukidnon, sulod ning tuig 2021, base sa pamahayag niini atol sa gipahigayon nga Flag Raising and Seal of Good Local Governance (SGLG) Awarding Ceremony kagahapon sa buntag-Enero 18, 2021 sa Kaamulan Open Theater, ning syudad sa Malaybalay.
Gibutyag ni Governor Zubiri nga alang sa dugang kalambuan sa probinsya, nakatakda kining mo-apod-apod ug dugang pondo, nga pagalangkuban sa mga mosunod: 1. ₱30-Million matag syudad/lungsod alang sa ilang infrastructure projects; 2. ₱1-Million matag barangay alang usab sa gilantaw nga proyekto sa 464 ka mga barangay sa Bukidnon; 3. ₱700-Million alang sa mga mag-uuma sa ilang libre nga binhi sa mais ug abono; ug 4. ₱300-Million alang sa pagpalit sa vaccine kontra COVID-19.
Base sa data gikan sa Provincial Engineer’s Office (PEO) nga gipangunahan ni Provincial Engineer Albert D. Yulo, nasayran nga sa milabay’ng tuig 2020, nagahin si Governor Zubiri sa kinatibuk-ang kantidad ₱2,085,049,707.95 nga gilangkuban sa locally funded projects sa probinsya sama sa General Fund, 20% Development Fund, Special Education Fund ug Local Disaster Risk Reduction Management Fund, ingon man sa uban nga infra projects nga gipondohan sa nasudnong pangagamhanan ubos sa programa sa DILG sama sa Conditional Matching Grant for Provinces, Performance Challenge Fund SGLG award, Local Government Support Fund SGLG and Enhanced Comprehensive Integration Program.
Ang opisina sa PEO mao ang nagahatag sa kalidad nga pagpadayon sa provincial road network, rehabilitation/reconstruction and improvement sa provincial roads and bridges, flood control projects, barangay road rehabilitation projects, construction and repair of school buildings; water supply projects; other calamity funded projects, construction/rehabilitation/repair of provincial hospitals and other government infra projects sama sa Development of Bukidnon Sports Complex, Commercial Arcade, Commercial Buildings ug uban pa.
Gawas sa maong mga programa ubos sa pagdumala sa PEO, pipila usab sa programa nga gipaagi sa financial assistance ngadto sa nagkalain-laing LGUs sa Bukidnon ang gipondohan sa pangagamhanang probinsyal nga ginasubay usab sa Provincial Project Monitoring and Inspectorate Team (PPMIT) sa pagpanguna ni Engr. Urbano U. Lampera. Sa tuig 2019-2020, kinatibuk-ang kantidad ₱1,483,588,223.79 ang nagahin ni Governor Zubiri alang sa mga proyekto nga maintenance of barangay and provincial roads, constructions sa mga tunghaan, construction of box culverts, housing ug uban pa.
Alayon niini, gipahinumdum sa Provincial Accounting Office ang mga naandan nga mga kinahanglanon nga angayang makumpleto sa mga LGUs aron hingpit makadawat sa gipasalig ni Governor Zubiri nga dugang pondo kantidad ₱30-Million alang sa ilang infrastructure projects. Ang documentary requirement sa financial assistance gilangkuban sa disbursement voucher, obligation request, program of work, memorandum of agreement, governor’s authorization by SP to enter into MOA, request sa financial assistance, Sangguniang Panlungsod/Bayan to enter into MOA, MPDC certificate, ug ang certification gikan sa Provincial Accounting Office diin aduna pa gyud nagpabilin nga mga LGU nga wala pa maka-liquidate sa mga nangaging proyekto nga gipondohan sa pangagamhanang probinsyal, rason nga giawhag sa maong buhatan nga asikasuhon ang pagkumpleto sa ilang liquidation report.
###
