Press Release No. 16 | January 19, 2021

MIPAHIGAYON sa pagkurtesiya ang mga kawani sa Bureau of Fire Protection-Bukidnon sa pagpanguna ni Acting Provincial Fire Director, Chief Inspector Romeo L. Miranda kauban ang mga Fire Marshall sa 20 ka lungsod ug 2 ka syudad isip tinuig nga pagkurtesiya ngadto kang Bukidnon Provincial Governor Jose Ma. R. Zubiri, Jr. bag-ohay pa lamang, Enero 19, 2020 sa buntag didto sa PPDO Provincial Capitol, Malaybalay City, Bukidnon.

Personal nga gipaabot ni Chief Inspector Miranda sa ngalan sa tibuok pwersa sa Bureau of Fire Protection (BFP) ngadto sa Kagamhanang Probinsyal sa Bukidnon ilabi na ngadto kang Gov. Zubiri ang kinasing-kasing niini nga pagpasalamat gumikan sa kinatibuk-ang suporta niini ngadto sa ilang opisina hangtud sa kasamtangan. Gipanaad usab ni Miranda kauban ang tanang Fire Marshall nga ilang kanunay’ng suportahan ang tanan nga programa sa probinsya ug mahimong mabinantayon sa ilang tagsa-tagsa ka munipyo ug syudad ilabi ning panahon sa pandemya.

Midawat usab ug Plaque of Recognition isip Best Local Chief Executive gikan sa BFP Region-10 si Governor Zubiri isip pasidungog nga nakaangkon sa most outstanding accomplishments and significant contribution isip Local Chief Executive sa Calendar Year 2020 pinaagi sa walay puas nga pagsuporta, hugot nga paningkamot ug maayong pagdumala sa pagkab-ot sa katumanan sa misyon ug bisyon sa maong buhatan. 

Malipayon ug mapasigarbuhon nga gidawat ni Gov. Zubiri ang maong award gikan sa BFP-10 ug gidasig ang mga kawani nga sa iyang nahabilin nga isa ug tunga nga tuig sa pagdumala sa probinsya, ipadayon ang ilang maayong binuhatan ug imentinar ang Best Provincial Office sa BFP-10.

        Isip mapasigarbuhon nga amahan sa Bukidnon, misaad si Gov. Zubiri nga dugangan ang ilang financial assistance ngadto sa ₱13 milyones ka pesos aron suportahan ang ilang plano ug programa sa tuig 2021.

###