Press Release No. 19 | January 21, 2021

PIRMADO na ni Provincial Governor Jose Ma. R. Zubiri, Jr. ang usa ka mando alang sa hugot nga pagpatuman sa provisions sa Republic Act 4136 o ang Land Transportation and Traffic Code, alayon sa pagsunod sa direktiba ni Presidente Rodrigo Roa Duterte nga limpyohan ang tanan nga kadalanan gikan sa iligal nga pagbabag, subay sa DILG Memorandum Circular Nos. 2020-027 pinitsahan Pebrero 7, 2020 ug 2020-145 pinitsahan Oktobre 27, 2020 nga dumalahon ang padayon nga pagpatuman sa road clearing activities ingon man ang paghan-ay sa mga sumbanan niini.

Nalatid sa Executive Order No. 7, Series of 2021 ni Governor Zubiri, pinitsahan Enero 21, 2021, ang mga mahimong basehan sa pagpatuman sa road clearing activities sulod sa probinsya sa Bukidnon nga pagadumalahon sa Provincial Road Clearing Task Force (PRCTF). Tinguha niini nga matigayon ang hiniusang paningkamot sa mga ahensya nga magpatuman sa balaod ug ubang mga hingtungdang buhatan sa pagdili sa iligal ug nakababag nga pag-parking sa mga salakyan diha sa mga provincial roads sa Bukidnon.

Aron masiguro ang luwas nga pagamit sa mga provincial roads, ang Land Transportation Office ug ang mga gitugutan nga opisina ug indibidwal niini, ang kapulisan ug ang lokal nga kagamhanan, dinhi gimanduan sa hugot nga pagpatuman sa mga lagda nga anaa sa Akta Republika 4136, sama sa walay si kinsa mang driver nga tugotan sa pag-parking diha sa highway sa bisan unsa sa mga mosunod: sulod sa usa ka intersection, crosswalk, sulod sa unom ka metro gikan sa intersection sa curb lines, sulod sa upat ka metro sa agi-anan sa fire station, sulod sa upat ka meto sa fire hydrant, atubangan sa pribadong agi-anan, sa daplin sa dalan sa bisan unsang sakyanan nga mihunong o nakaparada sa ngilit nga bahin sa highway, ug sa bisan asang lugar diin gitukod ang opisyal nga mga karatula nga nagdili sa pag-park. Dugang usab nga gitahas sa mga nanganlang ahensya ug buhatan nga kutob sa mahimo, pugngan ang dili kinahanglan ug makababag nga pag-parking sa motor sa provincial roads sa Bukidnon.

Alayon niini nga kalambuan, pirmado usab ni Governor Zubiri ang EO No. 6, Series of 2021 diin gitudlo ang “Isumbong Mo Kang Governor”program isip official social and mass media channel alang sa mga reklamo sa paghawan sa dalan ingon man ang pagtugot sa PRCTF sa pag-asikaso niini nga mga reklamo. Busa, giawhag ang tanang indibidwal o opisina o sektor sa pagpadangat sa impormasyon kung adunay nabantayan nga wala pa mahawan nga provincial roads, pinaagi sa opisyal nga social and mass media channel.

Sa ulahing kalambuan sa kalihukan sa PRCTF, aduna nay natumbok nga mga matang sa obstruction sa tibuok probinsya, sama sa iligal nga nakaparada nga salakyan (34), illegal vendors (4), illegal terminals (7), street dwellers (1), public barangay structures and outpost (151), store encroachment (97), shanties and house encroachment (192), garbage dumps (1), ug ubang matang sa nakababag sa dalan sama sa electrical posts (608). Kining tanan nga anaa subay sa provincial roads gipasusi na sa gobernador kung unsa ang angayan ug maki-angayon nga buhaton alang sa mga maapektuhan nga mga gambalay ug mga estruktura.

###