Sila Assistant Provincial Agriculturist Jacqueline Julia Lagamon ug si Regional Technical Director for Operations Division- DA 10 Carlota S. Madriaga ug mga kaubanan, uban ang Municipal Agriculturist, Municipal Engineer sa lungsod sa Kadingilan, ug mga opisyales ug membro sa Balaoro Farmers Association (BAFA) Inc. mihimo sa Ground Breaking Ceremony sa Cacao Processing Center with Site/Land Development and Perimeter Fence, usa ka programa sa PGB ug sa Department of Agriculture – Philippine Rural Development Project (PRDP), niadtong Enero 21, 2021 didto sa Brgy. Balaoro, Kadingilan, Bukidnon.

Press Release No. 20 | January 22, 2021

MALAMPUSONG gipahigayon sa Kagamhanang Probinsyal sa Bukidnon sa pakigtambayayong niini sa Department of Agriculture – Philippine Rural Development Project (PRDP) alang sa Ground Breaking Ceremony sa Cacao Processing Center with Site/Land Development and Perimeter Fence kagahapon-Enero 21, 2021 sa buntag didto sa Brgy. Balaoro, Kadingilan, Bukidnon. Kini gitambungan nila Regional Technical Director for Operations Division- DA 10 Carlota S. Madriaga, Assistant Provincial Agriculturist Jacqueline Julia Lagamon, uban ang mga kaubanan niini sa Provincial Agriculture’s Office, Municipal Agriculturist, Municipal Engineer, ang contractor niini ug mga opisyales ug membro sa Balaoro Farmers Association (BAFA) Inc.

Sa impormasyon nga gipadangat ni Provincial Supervising Agriculturists Emma C. Ravelo nga ang kinatibuk-ang proyekto mikabat ngadto sa ₱10,905,944.00 diin ang ₱5,234,361.60 niini gikan sa loan sa World Bank, parehong mikantidad sa ₱1,744,787.20 niini gikan sa Philippine Government ug Provincial Government of Bukidnon, ug ₱2,182,011.82 ang gikan sa Balaoro Farmers Association (BAFA) Inc. isip ilang counterpart. Ang maong kantidad nabahin ngadto sa ₱4,800,000.00 para sa Cacao Processing Center, ₱2,469,000.00 para sa hauling vehicle, ₱1,245,800.00 para sa processing equipment ug ₱209, 076.00 para sa raw materials. Ang lot area nga pagatukuran sa maong processing center adunay gilapdon nga 800 square meters o 20X90 sq.mtrs. ug ang gilapdon sa building nga pagatukuron niini moabot ngadto sa 200 sq.mtrs. o 10X20 sq.mtrs.

Mapasalamaton ang mga opisyales ug mga membro sa BAFA ngadto sa buhatan sa Department of Agriculture Region 10 ug Kagamhanang Probinsyal sa Bukidnon pinaagi sa Provincial Agriculture’s Office sa pagsuporta sa mga proyekto sa ilang asosasyon. Ang BAFA Inc. adunay 104 ka membro ug 80 niini ang adunay tinanom nga Cacao diin mokabat ngadto sa 74 ektaryas kapin kung kulang ang kinatibuk-ang luna nga ilang gitamnan sa Cacao. Nasayran nga daan nang gabaligya ug tablea ang maong asosasyon ug gina-market sa lain-laing probinsya sa nasud. Nakatakda usab nga iparehistro sa asosasyon sa Bureau of Food and Drugs ang ilang pagatukoron nga negosyo, kung mahuman na ang building sa processing center.

Alayon niini, gidasig ni Regional Technical Director for Operations Madriaga ang mga membro sa Balaoro Farmers Association (BAFA), Inc. nga ipalambo ang gihatag sa gobyerno nga proyekto ngadto kanila pinaagi sa pag-level up sa ilang asosasyon ngadto sa kooperatiba ug himuan sa  rest area o stop over aron molambo ang ilang grupo ug modaghan ang ilang customer. Susamang panghinaut usab ang gipadangat ni Assistant Provincial Agriculturist Lagamon dungan ang pamahayag nga andam ang Pangagamhanang Probinsyal sa Bukidnon, pinaagi sa Provincial Agriculture’s Office, nga motabang kanila.

Ang BAFA mao ang pinakauna nga benepisyaryo sa Bukidnon nga naaprobahan sa DA-PRDP ubos sa Rural Enterprise and Agriculture and Fisheries Productivity (I-REAP).

###