Press Release No. 23 | January 25, 2021

IPAHIGAYON sa Kagamhanang Probinsyal sa Bukidnon sa pagpanguna ni Governor Jose Ma. R. Zubiri, Jr. pinaagi sa Provincial Agriculture’s Office (PAgro) ang pinakaunang Techno Demo on Organic Upland Rice sa Barangay Poblacion, Libona, Bukidnon sa umaabot Enero 28, 2021.

Sa impormasyon nga gipadangat ni PAgro Supervising Agriculturist Maria Lilith M. Turan nga tumong sa maong techno demo aron masulayan ang pagtanom niini sa taas nga lugar, mapadaghan ang semilya sa humay ug ma-adaptar sa mga mag-uuma ang pagtanum sa humay nga anaa sa taas nga bahin.

Matud pa ni Supervising Agriculturist Turan nga adunay 2,400 square meters nga luna ang gitagana sa Local Government Unit sa Libona pinaagi sa Municipal Agriculture’s Office para sa techno demo diin itanom ang semilya sa upland rice. Mokabat usab sa 12 ka mga variety sa upland rice ang ipa-demo sa maong luna nga amumahan sa mga mag-uuma diin ang PAgro ang maghatag kanila sa mga libreng abono sama sa vermicast, iti ug organikong mga pesticides ug herbicides. Sa 12 ka variety, 200 sq. mt. per variety ang pagatamnan niini.

Dugang usab ni Turan nga kung magmalampuson ang techno demo on organic upland rice, ang mamahimong unang bunga o harvest niini mao na usab ang pagagamiton sa techno demo didto sa laing distrito ning probinsya aron modaghan ug mosanay hangtud maka-adaptar kini sa ilang kaumahan.  Dako usab kini matud pa ug ikatabang ngadto sa mga mag-uuma sa probinsya ilabi na sa mga dili matamnan sa humay ang ilang dapit gumikan kay anaa sa taas nga bahin. Gawas niini, matabangan usab sila nga adunay makonsumo nga pagkaon ang ilang pamilya ug kung adunay sobra ila kining mabaligya.

Gibutyag usab Supervising Agriculturist Turan nga sa kasamtangan, mas daghan ang gapangita sa bugas nga gikan sa upland rice sama sa denorado gumikan humot ug mas lami kini kumpara sa lowland rice nga halos susama lamang ang presyo. Basi sa natala nga record gikan sa opisina sa PAgro, adunay 2,800 kapin kon kulang ka ektarya nga nahimutang sa ibabaw nga bahin nga mga kaumahan sa atong probinsya nga walay irigasyon ang pweding matamnan sa upland rice. Mopahibalo ra usab ang PAgro sa sunod nga schedule sa techno demo alang sa district 3 nga ipahigayon sa munisipyo sa Kitaotao.

Hugot usab nga misuporta si Gov. Jose Ma. R. Zubiri, Jr. sa maong kalihukan diin iya usab nga gidasig ang mga mag-uuma nga pahimuslan ang mga programa sa probinsya aron makatabang sa ilang inadlaw-adlaw nga panginabuhian ug mapalambo ang ilang kaumahan.

###