Press Release No. 24 | January 26, 2021

GIHATAGAN ug lugway sa Provincial Government of Bukidnon (PGB) ang mga electric cooperatives nga tangtangon ug ibalhin ang ilang mga posti sa kuryenti nga nakalapas sa provincial road right of way sulod sa tulo (3) ka bulan, gikan sa pagkadawat sa sulat-pahibalo ni Provincial Governor Jose Ma. R. Zubiri, Jr. nga gisugdan sa pagpanghatud niadtong Enero 21, 2021.

Base sa gipadala nga sulat ni Governor Zubiri, 579 ang ihap sa mga posti sa kuryenti nga nakalapas sa provincial road right of way nga iya sa tulo ka mga electric cooperatives nga nag-operate sa Bukidnon, nga mao ang mosunod: FIBECO adunay natala nga 161 ka mga posti; BUSECO – 387; ug MORESCO – 31, subay sa inventory report of road obstructions sa Provincial Road Clearing Task Force (PRCTF).

Kini pinasikad sa mandatu nga nakalatid sa DILG Memorandum Circular Nos. 2020-027 pinitsahan Pebrero 7, 2020 ug 2020-145 pinitsahan Oktobre 27, 2020 nga dumalahon ang padayon nga pagpatuman sa road clearing activities, sa lokal nga kagamhanan ug angayang sundon sa tinguha nga mapuslan ang mga pampublikong dalan sa pampublikong gamit.

Gawas sa mga electric cooperatives, gipahibalo na usab ang mga indibidwal nga nakalapas sa provincial road right of way, sama sa mosunod: iligal nga nakaparada nga salakyan (34), illegal vendors (4), illegal terminals (7), street dwellers (1), public barangay structures and outpost (151), store encroachment (97), shanties and house encroachment (192), garbage dumps (1), ug ubang matang sa nakababag sa dalan sama sa electrical posts (608).

Kinahanglan nga walay babag sa 10 meters carriageway sa provincial road diin 5-metros gikan sa center lane padulong sa isig-ka-daplin sa dalan.

Subay niini, kasamtangan usab nga gipasusi ang groundwork for assessment ni Governor Zubiri ang mga gambalay ug estruktura nga nakalapas sa dalang-pangprobinsyal sa Provincial Social Welfare and Development Office ug sa PGO-Real Estate Housing and Development Division alang sa displacement plan kung unsa ang angayan nga pagpahimutang sa maong mga road encroachments and obstructions sulod sa provincial roads.

###