Press Release No. 27 | January 29, 2021

NAGPAHAYAG sa iyang kinasing-kasing nga pagpasalamat si Provincial Governor Jose Ma. R. Zubiri, Jr. sa tanang nagretiro nga empleyado nga mihimo sa pagpahinungod sa ilang labing mabungahon nga mga tuig sa ilang kinabuhi sa pagserbisyo sa Provincial Government of Bukidnon (PGB).

Kini ang gipahayag ni Governor Zubiri sa gipahigayon nga Virtual Awarding and Recognition of 2019 Retirees pinaagi sa LGU-Bukidnon- Public Affairs Information and Assistance Facebook Page, kaganihang alas 10 sa buntag, Enero 29, 2021.

Gumikan sa nasinati nga COVID-19 pandemic, gipasidunggan ang 20 ka mga nagretiro gikan sa July-December 2019 pinaagi sa virtual recognition rites, diin kini usab ang pinaka-unang higayon nga gipahigayon ang susamang pagpasidungog gikan sa naandan nga face-to-face recognition rites.

Mainition usab ang pagtimbaya ni Provincial Administrator Jay S. Albarece sa iyang pag-abi-abi sa tanang retirees dungan ang pagpasalamat sa ilang serbisyo sa probinsya, ingon man usab ang paghatag ni Provincial Vice Governor Rogelio N. Quiňo sa pagdasig nga dili mohunong sa pagkat-on sa mamahimo nilang buhaton sa sunod nga hugna sa ilang kinabuhi aron padayon nga maangkon ang paglambo kauban ang ilang matag pamilya.

Dugang pamahayag sa gobernador nga sa miaging mga dekada nga gigahin sa mga nagretiro sa ilang pagpanarbaho sa probinsya, nasaksikan nila kung unsa ang paglambo sa pangagamhanang probinsyal ngadto sa multi-awarded professional province, gumikan sa paghatud sa mga batakan ug nag-unang serbisyo ngadto sa katawhan sa probinsya, nga diin kabahin silang tanan niining maong mga kalambuan ug kalampusan sa PGB.

Gibutyag ni Ms. Aida B. Loveres, PG-Department Head – Provincial Human Resource Management Office nga ang mga nagretiro midawat sa Plaques of Recognition, ingon man service rings alang niadtong 15 years of service pataas, subay sa Program on Recognition and Award for Service Excellence (PRAISE) ug sa Provincial Government Employees Union of Bukidnon (PGEUB).

###