Mihimo sa pagkumpirma si Mr. Christopher Pangga, Regional Operations Manager sa San Miguel Foods, Inc. kalabut sa pagpahunong sa maong kompanya sa breeding sa mga baboy diha sa ilang Monterey affiliated piggeries, niadtong Pebrero 2, 2021 atol sa Regular Session sa 26th Sangguniang Panlalawigan, SP Session Hall, Legislative Bldg., syudad sa Malaybalay, Bukidnon.

Press Release No. 33 | February 3, 2021

GIHISGUTAN sa mga miyembro sa Sangguniang Panlalawigan ang kahimtang sa piggery/swine industry sa probinsya sa Bukidnon human gikumpirma ni Mr. Christopher Pangga, ang Regional Operations Manager sa San Miguel Foods, Inc. nga ipahunong na sa maong kompanya ang pagpadako sa baboy, pinaagi sa Monterey affiliated piggeries niini dinhi sa Bukidnon, sugod sa Marso 1, 2021, atol sa gipahigayon nga Regular Session kagahapon-Pebrero 2, 2021 sa Session Hall, Legislative Building, Capitol Compound, syudad sa Malaybalay.

Gipatawag ni Board Member Nemesio B. Beltran, Jr. ang hog raisers sa probinsya, management sa San Miguel, M. Montesclaros Enterprises, Inc., DOLE-Bukidnon Provincial Head, Provincial Agriculturist ug ang Provincial Veterinarian aron mohatag ug katin-awan sa karon ug sa umaabot nga kahimtang sa industriya sa baboyan sa probinsya (piggery/swine).

Sa pagpasabot ni Mr. Pangga, ang pagsirado gumikan sa epekto nga hatud sa African Swine Fever (ASF), ilabina didto sa Luzon nga nakapa-apekto usab sa ilang operasyon dinhi sa Bukidnon, gawas pa sa kalisod sa pagpadagan sa ilang patigayon ning panahon sa pandemya nga hatud sa COVID-19. Giklaro usab niini nga ang Monterey affiliated piggeries lamang ang ilang undangon apan padayon ang ilang poultry operations dinhi sa probinsya.

Labing gikaguol sa hog raisers ang nasangpit nga desisyon sa maong kompanya diin labing maapektuhan niini ang ilang investments ug ang ilang mga trabahante. Gipasabot usab ni Provincial Head Raul Valmores, DOLE-Bukidnon Provincial Field Office nga andam sila nga mo-abag sa mga maapektukang empleyado sa hog raiser industry.

Gibutyag ni Provincial Veterinarian Dra. Nancy V. Diez nga base sa PSA Survey sa tuig 2020 alang sa Total Inventory of Swine Population alang sa Rehiyon 10, miabot kini sa 1,059,320 nga gilangkuban sa 604,132 nga ihap sa baboy alang sa backyard farms ug 455,188 alang sa commercial farms, diin nag-una usab nga supplier dinhi ang probinsya sa Bukidnon. Sa backyard farms, ang Bukidnon mi-contribute ug 212,946 ka mga baboy, samtang 397,653 usab sa commercial farms.

Kung madayon ang pagpahunong sa breeding sa Monterey affiliated piggeries, dako kini ug epekto unya sa presyo sa karneng baboy, diin karon pa lang daan, taas na ang presyo niini tungod sa hulga sa ASF.

Gikatakda nga magtagbo pag-usab ang mga gipatawag nga bisita sa 26th SP sa sunod adlaw’ng Martes aron maka-uban sa meeting si Provincial Governor Jose Ma. R. Zubiri, Jr. ug gilauman nga makatukod ug mas lig-on nga lokal nga balaodnon alang sa proteksyon sa hog industry, sa mga trabahante niini ingon man sa mga konsumante.

Alayon niini, padayon ang hugot nga pagbantay sa 13 ka mga Provincial Veterinary Sanitation Checkpoints, subay sa Executive Order No. 35, series of 2020 ni Governor Zubiri, pinitsahan Agosto 18, 2020 nga dili magpasulod sa baboy, karneng baboy ug ingon man ang mga produkto nga gama sa karneng baboy, aron malikayan ang ASF diri sa Bukidnon.

###