Press Release No. 36 | February 8, 2021

IPAHIGAYON sa Provincial Government of Bukidnon (PGB), pinaagi sa Provincial Veterinary (PVet) Office, ang Information, Education, and Communication (IEC) Campaign batok sa African Swine Fever (ASF) didto sa Barangay Kalagangan, lungsod sa San Fernando, Bukidnon karong umaabot Pebrero 11, 2021.

Base sa ulahing kasayuran gikan kang Provincial Veterinarian Nancy V. Diez, gipadangat sa ilang buhatan sa Livestock Coordinator sa LGU-San Fernando ang kasamtangang sitwasyon sa Barangay Kalagangan diin mihimo sa pagpangbaligya ug gipang-ihaw sa mga backyard swine raiser ang ilang mga binuhing baboy sa kahadlok nga moabot sa ilang lugar ang ASF, rason nga mohimo didto ang PVet sa IEC Campaign aron mapasabot ug mahatag kanila ang tukmang pamaagi o bulohaton aron mapugngan ug dili makasulod sa ilang dapit ang ASF. Gikabalak-an sa mga namuhi sa baboy nga motabok ang impeksyon sa ASF, sanglit anaa man sa utlanan ang ilang barangay tali sa Bukidnon ug sa Davao Region.

Sa miaging tuig, mihimo sa IEC Campaign ang PVet ngadto sa mga border barangays sa Bukidnon, ubos sa pag-abag sa Northern Mindnao Hog Raisers Association diin gipakisayud ang mga pamaagi, subay sa BABES strategy nga mao ang B-Ban Pork Import; A-avoid swill feeding; B-block entry; E-Educate people; ug S-submit samples, kung aha gidili and pagsulod sa karne sa baboy nga wala magikan sa Bukidnon, ilabi na ang mga imported nga produkto; pag-edukar sa publiko; culling sa mga baboy nga nasakit uban ang mga hayop nga naa sa 1-km radius; ug ang paghatag sa mga sample sa hayop nga adunay sakit ngadto sa mga awtoridad.

Giklaro ni Dra. Diez nga nagpabilin nga ASF Free ang Bukidnon, gani padayon ang 24/7 nga hugot nga pagbantay ug estriktong inspection sa mga salakyan nga mosulod sa Bukidnon, pinaagi sa gipangtukod nga 13 ka mga Provincial Veterinary Sanitation Checkpoints (PVSC) [Talakag, Baungon, Libona, Malitbog, Manolo Fortich (Alae, Mantibugao, Piligayon), Forchacu, Malinao ug Pamotolon sa Kalilangan, Kabalantian ug Lorega sa Kitaotao, Omonay-Damuglog, ug Kalagangan-San Fernando], subay sa Executive Order No. 35, Series of 2020 ni Governor Zubiri, pinitsahan Agosto 18, 2020. Ubay-ubay na usab ang nakumpiska nga mga produkto nga ginama gikan sa karneng baboy diha sa mga checkpoints, ilabi na sa Alae PVSC. Tungod niini, gipahimangno ni Dra. Diez sa tanang katawhan nga likayan ang pagdala sa mga produkto pasulod sa Bukidnon aron mapabilin nga luwas ang probinsya gikan sa ASF.

Sakop sa EO Number 35 ni Governor Zubiri ang pagdili sa pagdala-pasulod sa Bukidnon sa mga de-latang produkto nga gama sa karneng baboy, sama sa ham. Bisan ang mga mall ug mga tindahan, gisuroy na usab sa mga City/Municipal Veterinary Offices sulod sa Bukidnon aron ipahibalo nga gidid-an sila sa pagbaligya niini nga mga produkto karong mga panahona. Kung aduna man ugaling mahibalo-an nga namaligya niini, bisan online selling, mamahimo kining i-report sa PVet Office Hotline number 0917-146-9223.

###