Press Release No. 39 | February 10, 2021

MIKABAT ngadto sa 6,478 ka mga indibidwal ang natabangan sa Kagamhanang Probinsyal sa Bukidnon sa pagpanguna ni Governor Jose Ma. R. Zubiri, Jr. pinaagi sa financial assistance sa Aid to Individual/Families in Crisis Situation o AIFCS sa Provincial Welfare and Development Office o PSWD sa tuig 2020.

Base sa gisumite nga 2020 Accomplishment Report sa maong buhatan ngadto sa Provincial Planning and Development Office o PPDO, miabot ngadto sa ₱6,149,976.00 ang nahatag sa PSWD sa pagpanguna ni Provincial Social Welfare and Development Officer Ceferina O. Caiña diin 924 ka indibidwal niini ang Senior Citizen ug Persons with Disabilities nga nahatagan ug ₱1,158,600.00 samtang 5,554 usab ka mga pinakakabus nga pamilya nga anaa sa krisis nga sitwasyon sa probinsya ang natabangan nga mi-total ngadto sa ₱4,991,376.00. Ang maong financial assistance naglangkob sa Burial, Emergency Shelter, Transportation and Medical and Food Assistance lakip na ang mga referrals sa laing mga ahensya.

Gumikan sa COVID-19 nga pandemya, ang Kagamhanang Probinsyal nakahatag usab ug financial assistance sa mga giila nga mga pinakakabus sa probinsya lakip na niini ang bugas ug de lata sa dos syentos mil ka mga pamilya sa 20 ka lungsod ug duha ka syudad nga mikabat ngadto ₱613,206,450.00. Gawas niini, nahatagan usab ug financial assistance nga tag 2,000 ka pesos matag usa ang 587 ka mga Locally Stranded Individuals (LSIs) gikan sa Visayas ug Luzon nga mi-total ngadto sa P1,174,000.00.

Mikabat ngadto 6,463 ka mga pamilya nga naapektuhan sa natural ug man-made nga katalagman ug emerhensya lakip na niini ang armed conflict, flashfloods, earthquake ug daghan pang uban nga nahatagan sa mga relief goods sama sa bugas ug mga de lata nga mi-total ngadto sa ₱6,942,500.00.

Nahatagan usab ug Educational Assistance sa dili molapas sa ₱2,000 matag usa ang 1,231 student beneficiaries nga nagtungha sa State and Private Colleges and Universities sa probinsya nga mi-total ngadto sa ₱2,167,500.00.

          Dugang niini, ang nahatag nga Handog Pamasko ni Gov. Zubiri ngadto sa 28,399 nga pinakakabos nga pamilya sa probinsya mikabat ngadto sa ₱24,248,200.00 diin tag-1,000 ka libo ka pesos niini ang nahatag sa pamilya nga adunay 5 ka membro pataas ug 800 pesos alang sa lima paubos nga membro sa pamilya.

          Nagahinan usab ug tabang ang Kagamhanang Probinsyal alang sa Child Protection, pinaagi sa pagtukod ug Balay Paglaum nga nahimutang sa Capitol Compound, Malaybalay City nga nagkantidad sa ₱13,854,490.45. Ang maong konstraksyon gilauman nga makompleto ug mahuman sa Marso 6, 2021.

          Sa kinatibuk-an, ang Provincial Social Welfare and Development Office migasto ug ₱667,894,490.00 sa tanang mga programa niini.

###