Press Release No. 42 | February 11, 2021

MIABOT ngadto sa 2,976 ka mga baka sa probinsya ang nabakunahan sa Hemorrhagic Septicemia (HS) bacterin sa Bukidnon Provincial Veterinary Office o PVet sa tuig 2020 sa pagpanguna ni Provincial Veterinary Dr. Nancy V. Diez. 1,649 usab niini ang nabakunahan nga mga kanding ug 1,881 ka mga kabaw, basi sa gisumite nga 2020 Annual Accomplishment Report ngadto sa Provincial Planning and Development Office o PPDO.

          Ang pagpamakuna sa Hemorrhagic Septicemia (HS) bacterin gipahigayon aron maprotektahan ang mga kahayopan sa Pasteurella Multocida serotype B nga maoy hinungdan sa acute disease sa mga binuhing kahayopan sa tropical nga nasod, sama sa Pilipinas. Ang pagpamakuna makatabang aron mapataas ang resistensya sa mga baka, kabaw ug kanding nga maoy usa sa mga panginabuhian sa lokal nga mag-uuma. Basi sa report, ang HS disease delikado nga impeksyon sa mga kahayopan diin ang matakbuyan niini mamatay sa dili mominus 24 oras human kini makitaan ug mga simtomas.

          Lakip nga kalihukan nga gipahigayon sa PVet mao ang Deworming diin sa tuig 2020, 9,119 ka mga baka ang nabakunahan, 4,880 ka mga kabaw, 2,645 ka mga kabayo, 5,940 ka mga kanding ug karnero, 14,517 ka mga baboy, 4,397 ka mga binuhing iro ug 48,819 ka mga manok. Mipahigayon usab sila sa hog cholera vaccination diin 1,459 ka mga baboy niini ang nabakunahan.

         Nahatagan usab ug bitamina sa PVet ang 32,400 ka mga binuhing manok, 8,056 ka mga baka, 4,040 ka mga kabaw, 1,643 ka mga kabayo, 3,255 ka mga karnero ug kanding, 7,280 ka mga baboy ug 2,558 ka mga binuhing mga iro. Importrante ang pagpainom ug bitamina sa mga kahayupan aron sakto ang pagdako niini, taas ang resistensya batok sa mga sakit ug dako ang ilang pagtubo.

         Pinaagi sa Rabies Eradication Program, mikabat usab ngadto sa 91,286 ka mga binuhing iro ang nabakunahan batok sa rabbies diin 56.72% kini sa gibana-banang 160,928 nga populasyon sa mga iro sa probinsya. 3 ka mga LGU nga 100% ang target nga nabakunahan sa rabbies nga mao ang munisipyo sa Quezon ug Baungon ug syudad sa Malaybalay. Usa sa problema nga wala nabakunahan ang tanang mga iro gumikan sa COVID-19 pandemic ug kakulangon sa supply o budget sa mga LGU’s sa rabbies vaccine. Ang Department of Agriculture naghatag ug 34,000 ka doses sa rabies samtang 4,500 ka doses usab gikan sa Kagamhanang Probinsyal sa Bukidnon.

         Ang PVet mipahigayon usab ug training sa mga volunteer barangay vaccinators sa lungsod sa Quezon ug Baungon. Mipahigayon usab kini ug Information and Education Campaign alayon sa pagsaulog sa Rabies Awareness Month ug Word Rabies Day.

###