Press Release No. 40 | February 11, 2021

MAPASALAMATON ang Provincial Government of Bukidnon (PGB), pinaagi ni Governor Jose Ma. R. Zubiri, Jr., kinsa gi-representahan ni Provincial Administrator Atty. Jay S. Albarece ngadto sa Moving Urban Poor Communities Towards Resilience in Mindanao Project o mas naila nga MOVE UP Mindanao sa pagtunol niini sa dugang duha (2) ka mga module sa community quarantine units alang sa probinsya, kagahapong adlawa-Pebrero 10, 2021 sa COVID-19 Isolation Facility sa probinsya, ang Northern Mindanao Wellness and Reintegration Center (NMWRC), syudad sa Malaybalay, Bukidnon.

Sa wala pa ang pormal nga pagtunol, unang gipahigayon ang stakeholders meeting dinhi sa PPDO Conference Room aron ipasabot ang mga programa ug kalihukan sa maong hugpong, nga nahisubay usab sa gipatuman nga mga programa ug proyekto sa lokal nga kagamhanan. Kini gawas pa sa gilusad nga suporta agi og aksyon kontra COVID-19 dinhi sa Probinsya sa Bukidnon ingon man sa Misamis Oriental alang sa Phase 4 project sa MOVE UP Mindanao. Labing gitutukan sa nasangpit nga grupo ang pagtabang sa probinsya nga mag-adbokasiya ug magtinguha sa mga hiniusang pamaagi sa pagpanalipod sa kabus nga katilingban aron masiguro ang maayo nga paghatud sa labing gikinahanglang serbisyo o tabang sa panahon sa emerhensiya.

Ang MOVE UP Mindanao nagtoo nga mamahimong lig-on ang usa ka komunidad kung ang namuyo dinhi aduna usab kusog ug kalig-on sa ilang katilingban diha sa aspetong sosyal, mauswagon nga ekonomiya, ingon man sa kinaiyahan, institusyon ug imprastraktura. Ang Bukidnon sa hisgutanan sa Alternative Temporary Shelter (ATS) Solutions kung anaa sa panahon sa amerhensiya, nakahimo na kini sa risk assessments and design test ATS models and systems. Angayang ipadayon na lamang sa probinsya ang paghiusa sa ATS diha sa naka-plano na nga mga programa og paghatag katumanan niini, ug pagpahibalo sa publiko kabahin sa mamahimong adbokasiya.

Naona na nga natunol sa MOVE UP Mindanao sa Bukidnon ang tulo (3) ka units sa portable handwashing stations niadtong Mayo 28, 2020 ug niadtong Agosto 18, 2020, unang duha (2) ka modules sa community quarantine units ang nahatag diha sa NMWRC.

Niini nga kalambuan, gipadangat ni Atty. Albarece ang dakong pagpasalamat ni Governor Zubiri sa inisyatibo nga pagtabang sa MOVE UP Mindanao, nga usa ka Non-Government Organization-funded by European Union Civil Protection and Humanitarian Aid, tungod kay dako kini ug mahimong kontribusyon sa paningkamot sa pangagamhanang probinsyal nga makontrol, maminusan ug hingpit mahunong ang pagsabwag sa COVID-19.   

###