Press Release No. 41 | February 11, 2021

MALAMPUSON nga napahigayon sa hiniusang pwersa sa national government agencies, pinaagi sa National Housing Authority (NHA), Department of the Interior and Local Government (DILG), uban ang kasundaluhan ubos sa 403rd Infantry Brigade, Philippine Army, ug sa Provincial Government of Bukidnon ang pag-raffle sa lot and block numbers sa mamahimo nga housing units sa mga former rebels (FRs), kagahapong adlawa-Pebrero 10, 2021 dinhi sa Centennial Stage, Kaamulan Park, syudad sa Malaybalay, Bukidnon.

Sa data gikan sa NHA, nasayran nga 250 ka mga housing units ang gipasiugdahan niini, ug ona nga matunol nga libre ang 100 ka rowhouse housing units dinhi sa Barangay San Jose, syudad sa Malaybalay nga adunay kaluagon sa 22 square meters floor area sa kantidad nga ₱450,000.00 matag balay, nga mao usab ang gibunot kagahapon alang sa kung si kinsa ang mag-angkon sa lot and block numbers sa AFP-PNP Pine Ville Project.

Ang maong kalambuan resulta sa paningkamot sa Provincial Enhanced Comprehensive Local Integration Program (Provincial E-CLIP) sa Bukidnon, kinsa mao ang miila, mi-proseso ug nag-endosar sa mga kinahanglanon sa mga kanhi rebelde pinaagi sa evaluation ug validation. Naona na nga napahigayon ang ceremonial turn-over sa nasangpit nga housing units nga gipangunahan nila Secretary Jose Ruperto Martin M. Andanar, Cabinet Officer for Regional Development and Security (CORDS) Region X, regional manager Engr. Rolando I. Teves, Jr. sa NHA Regional Field Office 10, ug sa Provincial E-CLIP niadtong Disyembre 8, 2020.

Subay sa kamanduan ni Presidente Rodrigo Duterte nga nahipatik sa Administrative Order No. 10, nga giulohan ug “CENTRALIZING ALL GOVERNMENT EFFORTS FOR THE REINTEGRATION OF FORMER REBELS AND CREATING FOR THE PURPOSE AN INTER-AGENCY TASK FORCE”, pinitsahan Abril 3, 2018, natukod ang Bukidnon Provincial E-CLIP nga gilangkuban sa Provincial Government of Bukidnon diin chairman si Provincial Governor Jose Ma. R. Zubiri, Jr., co-chairman ang 403rd Brigade, 4ID, Philippine Army, mga miyembro ang DILG-Bukidnon, PNP-Bukidnon Provincial Police Office, Provincial IPMR ug ang Provincial Social Welfare and Development Office.

Sa mensahe ni provincial administrator Atty. Jay S. Albarece, tataw ang katumanan sa programa sa Whole of Nation Approach sa nasudnong kagamhanan alang sa mga FRs ug gihatagan sa gimbug-aton ang pagtinabangay sa mga ahensya sa nasudnong kagamhanan ingon man sa Local Government Units, bisan ning panahon sa pandemya. Kasayud ang mga opisyal nga dili sayon ang pagbalik sa sabakan sa gobyerno sa mga kanhi rebelde busa gihimo niini angayang tabang ug angayan usab bugti-an ang maong paningkamot, pinaagi sa pagpahimulos sa talagsaon nga higayon nga gihatag sa gobyerno ngadto nila nga mga naglihok sa walhong grupo ug dinhi gipakita nga sila mahinungdanon sa katilingban.

###