Press Release No. 45 | February 16, 2021

GIPASALAMATAN sa Provincial Government of Bukidnon (PGB), pinaagi ni Provincial Governor Jose Ma. R. Zubiri, Jr. ang mga mag-uuma sa Bukidnon gumikan sa dakong tabang niini sa kalampusan nga nakab-ot sa lalawigan isip ika-lima nga labing adunahang probinsya sa tibuok nasud, atol sa gipahigayon nga Turn-over Ceremony of Corn Shellers with Engine kaganihang buntag-Pebrero 16, 2021 sa Provincial Agriculture Office, Capitol Compound, syudad sa Malaybalay, Bukidnon.

Gibutyag ni Governor Zubiri nga tungod sa sakripisyo ug kugi sa mga mag-uuma, malampusong nilambo ang Bukidnon gikan sa kapobrehon, inubanan sa pag-abag sa tanang opisyales sa probinsya, stakeholders, mga departments heads ug mga empleyado, ingon man sa mga lungsod ug syudad niini, busa angayan lamang kining bugtian sa hinabang sa makinaryas alang sa ilang pagpanguma.

Gani, nagahin na usab ang Gobernador ug pondo alang sa laing hugna sa pagpang-apod-apod sa libreng binhi ug abono karong tuig ngadto sa mga pinaka-kabus nga mag-uuma sa mais nga adunay gitikad nga yuta usa ka ektarya paubos.

Base sa kasayuran gikan ni provincial agriculturist Engr. Alson Quimba, ang pondo nga gipalit sa 16 units corn shellers with engine nagikan sa Corn Quality Award sa Department of Agriculture niaging tuig nga adunay ganting salapi kantidad ₱4-Million. Sa tibuok nasud, lima (5) ka probinsya lamang ang nakaangkon sa maong pasidungog, ug usa na ang Probinsya sa Bukidnon human makapasa sa Standard Corn Quality, kung aha labing gibasihan ang Aflatoxin level sa yellow corn, gidaghanon sa ani ug sufficiency level.

Sa 16 units corn shellers with engine, siyam (9) ang una nga matunol ngadto sa mosunod nga benipisyaryo: Lingating 5Cs MPC sa Baungon; Migcawayan Tribal Agriculture Cooperative sa Damulog, Maama-Poblacion sa Impasugong; Sibonga MPC sa Kadingilan; Cagawasan Farmers Association sa Kibawe; Bugcaon Kulasihan Manupali Irrigators Association sa Lantapan; La Roxas MPC sa Maramag; Organikk MPC sa San Fernando; ug Sumilao Occasion Farmers Association sa Sumilao, samtang ang unom ka beneficiaries kamulo pa ug kumpleto sa ilang mga rekisitos.

Pamahayag ni Engr. Quimba nga nag-onang basihan sa pagtunol sa farm equipment for corn farmers ang ilang letter of intent, adunay land area ang organisasyon o asosasyon sa dili moubos 50 hectares ug kinahanglang aktibo ang ilang grupo gikan sa management ngadto sa pagdumala sa mga miyembro niini pinaagi sa pakigtagbo regular, katukoran sa ilang mga proyekto o programa ug ang pagmintina sa ilang pasilidad. 

###