Press Release No. 47 | February 17, 2021

DAKO ang pagpasalamat sa Northern Mindanao Hog Raisers Association (NorMinHog) sa Provincial Government of Bukidnon, pinaagi sa tukma nga pagpagawas ni Provincial Governor Jose Ma. R. Zubiri, Jr. sa Executive Order No. 35, Series of 2020 pinitsahan Agosto 18, 2020 nga dili magpasulod sa baboy, karneng baboy ug ingon man ang mga produkto nga gama sa karneng baboy, aron malikayan ang African Swine Fever (ASF) diha sa 13 ka mga Provincial Veterinary Sanitation Checkpoints sa lalawigan.

Sa pamahayag ni Mr. Leonilo Go, Jr., representante sa NorMinHog kagahapong adlawa atol sa ika-78 nga Regular Session sa Sangguniang Panlalawigan (SP), ang probinsya sa Bukidnon ang pinaka-unang nagpagula sa maong mando sa tibuok nasud, gani usa kini sa nagpabilin, sa pagkakaron, sa Rehiyon-10 nga luwas sa ASF bisan pa man ug napalibotan na kini sa mga lugar nga apektado na sa virus. Gibutyag usab niii nga ang anaa sa critical level ang swine industry, kung aha 60% na ang na-wiped out sa swine population sa Luzon area. Hinuon, gipasalig ni Mr. Go nga sa ilang member-piggeries (12 members in Bukidnon, excluding Monterey), walay naigo sa pagkakaron sa ASF human mas gipahugtan pa ang ilang bio-security. Padayon usab ang pag-deliver sa ilang produkto ngadto sa Luzon ug ubang bahin sa Visayas, subay sa programa sa Department of Agriculture nga suportahan ang ubang probinsya nga ma-supplayan sa karneng baboy, ubos sa pagsiguro nga dili usab kulangon ang supply niini sa Bukidnon ug ma-afford sa mga konsumante nga dili kini mahimong luxury meat.

Sa pagpakisayud ni provincial veterinarian Dr. Nancy V. Diez ngadto sa mga miyembro sa SP kagahapon, ang Bukidnon adunay 186,470 heads sa commercial farm ug 144, 098 heads usab sa backyard farms base sa ilang monitoring sa CY 2020, hinungdan nga nagpatabang si Dra. Diez sa SP, labi na kang Governor Zubiri sa mga gikinahanglang pagpugong ug pagpu-o sa virus pinaagi sa pagpatuman sa Surveillance Testing sa mga binuhing baboy; ban of swill feeding o pagbahug ug pasaw ngadto sa baboy hangtud nga mawala ang hulga sa ASF; registration of viajeros sa lokal nga kagamhanan pinaagi sa estriktong pagsunod sa 1-7-10 protocol; ug ang Bantay ASF sa Barangay nga pagalangkuban sa LGUs, pribadong sektor uban sa grupo sa veterinarians ug hog raisers.

Sa pagkakaron, ang presyo sa live hog anaa sa ₱130-160 per kilo sa backyard farm ug ₱200 matag kilo sa commercial farm; samtang sa karneng baboy mapalit kini sa ₱165-175 per kilo.

###