Press Release No. 48 | February 18, 2021

MI-APILA si Provincial Governor Jose Ma. R. Zubiri, Jr. ngadto sa mga benepisyaryo sa Local Government Support Fund-Support to Barangay Development Program (LGSF-SBDP) nga mag-programa sa mga proyekto nga nalakip sa ilang investment program, kung aha haum sa kinahanglanon sa ilang barangay ug kini ipatuman sibo sa gitakda nga pondo nga gitambongan sa mga mayor, punong barangay, department heads ug personahe gikan sa DILG. Kini atol sa gipahigayon nga Coordination Meeting on the Implementation of LGSF-SBDP kaganihang buntag-Pebrero 18, 2021 sa Kaamulan Open Theater, Kaamulan Park, syudad sa Malaybalay, Bukidnon.

Kinatibuk-ang ₱1.4-B ang ibubo sa LGSF-SBDP dinhi sa probinsya sa Bukidnon niining tuiga, diin pinakadakong pondo nga nagahin sulod sa Rehiyon 10 alang sa  71 ka mga barangay nga giila sa kasundalohan nga cleared barangays gikan sa New People’s Army (NPA), gikan sa 12 ka mga lungsod sa probinsya nga gilangkuban sa Cabanglasan, nga adunay 2 ka barangay nga beneficiaries; Dangcagan (2); Impasugong (7); Kitaotao (4); Lantapan (9); Malitbog (3); Manolo Fortich (1); Pangantucan (2); Quezon (7); San Fernando (6); Sumilao (3); Talakag (3), ug lakip usab sa makapahimulos niini ang Valencia City ug Malaybalay City, kung aha modawat ang kada barangay sa tag-₱20-M.

Sa kasayuran gikan sa DILG Provincial Office, pipila sa mga naka-programang proyekto sa mga beneficiary barangays mao ang farm to market road, school building, health station, rural electrification, housing, agricultural, livelihood and technical vocational trainings ug uban pa. Tuyo nga gipatawag ang maong tigum aron mapasabot sa makapahimulos nga barangay nga adunay timeframe ang pagpatuman sa mga proyekto busa angayang tabangan aron mapadali ang pag-proseso sa mga requirements niini.

Base sa Executive Order No. 70 pinitsahan Disyembre 4, 2018 o ang mas naila nga Whole-of-Nation Approach nga naglaraw sa pagtapos sa Local Communist Armed Conflict (ELCAC), ug pinaagi sa DILG Memorandum Circular No. 2019-169 nga magpatuman sa Retooled Community Support Program (RCSP) isip usa ka pamaagi alang sa pagtagbo sa panginahanglanon sa kabarangayan. Sa paningkamot sa RCSP, ang beneficiary barangays motudlo sa ilang mga nag-una nga problema ug ang mga posebling proyekto nga magtubag sa maong mga problema.

 Tungod niini, mapasigarbuhong gipadayag ni Governor Zubiri ang iyang dakong pagpasalamat sa nasudnong pangagamhanan, ubos sa administrasyon ni President Rodrigo R. Duterte, pinaagi sa mga gitudlo nga secretaries niini sa gihimong suporta ug pagtabang sa probinsya sa Bukidnon, kung aha sunod-sunod nga gipangtunol ang mga programa ug proyekto. Kahinumduman nga niadtong Pebrero 12, 2021, gibutyag usab ni Department of Agriculture Secretary William Dar nga kinatibuk-ang ₱1.12-B ang gigahing pondo para sa programang pang-agrikultura alang sa probinsya sa Bukidnon.

###