Press Release No. 49 | February 22, 2021

GI-AWHAG sa Provincial Government of Bukidnon, pinaagi sa Provincial Health Office (PHO) ang publiko nga magmabinantayon sa impormasyon nga makita ug mabasa online aron malikayan ang sayop nga impormasyon kalabut sa bakuna sa COVID-19.

 Kini ang gipaningkamotan karon sa PHO, sa pagpanguna ni Dr. Garry Guido Tabios, gumikan kay nagkatag karon sa social media ang dili ensaktong impormasyon sa gilaraw sa nasudnong pangagamhanan nga pagbakuna sa katawhan, pinaagi sa BIDA Solusyon: Mga Insaktong Impormasyon sa BIDA Bakunation.

Pipila sa mga kabalaka sa publiko ang gihatagan ug katin-awan sa BIDA Bakunation, sama sa kung unsa ang pamaagi nga mapugngan ang sakit diin base sa kasayuran, ang bakuna maoy maghimo ug antibodies sa atong lawas nga mao usab ang magkontra sa sakit ug magprotekta kanato batok sa virus; gipasabot usab nga ang mga bakuna magmugna ug immune response aron mas molig-on ang atong lawas, busa gikinahanglan ug gi-awhag ang katawhan nga magpabakuna aron makalikay sa grabe nga simtomas sa COVID-19.

Gipasabot usab sa Provincial Health Office nga sama sa uban nga mga bakuna sama sa anti-flu o BCG vaccine sa kabataan, adunay posebling epekto ang bakuna sama sa pagpamula, pagpangatol o paghubag sa gitupokan sa injection lakip na usab ang simtomas sama sa hilanat, pagkaluya o panghawoy sa lawas, pagsakit sa ulo, pagkalipong, kalibanga ug pagsuka diin kung makasinati niini gitambag ang pagpakonsulta sa pinakaduol nga health care professional. Kini nga mga posebling epekto, normal adverse reaction sa lawas sa tawo nga matupokan ug bakuna.

 Sa kasamtangan, ang gobyerno padayon sa pakigsabot sa lain-laing tigama sa vaccine kung aha gilauman nga moabot ang unang batch sa supply sa first quarter ning tuiga. Gipakisayud usab sa kagamhanan nga dili mapalit sa pribadong klinik o botika ang bakuna gumikan kay ang gobyerno lamang ang gihatagan sa katungod aron masiguro nga luwas ang bakuna nga mapalit. Prioridad nga mabakunahan ug una ang mga frontliners, sama sa mga health care workers, kasundaluhan ug kapulisan tungod sa inisyal nga limitado nga supply sa rason nga tanang nasud nanginahanglan niini ug sila usab ang taas ug risgo sa exposure sa pagbuhat sa ilang katungdanan.

 Aron nga kalikayan ang kabalaka, angayang likayan sa pagbasa ang mga post sa dili otorisado nga mga account/page/website diha sa online platforms. Pipila sa gitumbok sa Department of Health nga masaligang mga tinubdan sa kasayuran man ang DOH Facebook account ug website, ingon man website sa World Health Organization ug mga hingtungdang ahensya sa gobyerno.

 Kusganong gidasig ug kanunay gipahinumduman ni Provincial Governor Jose Ma. R. Zubiri, Jr. ang katawhan sa Bukidnon nga kanunay magsunod sa minimum public health standards, sama sa kanunay’ng pag-amping batok sa COVID-19 kung aha dili hikalimtang nga maghugas o kanunay mag-alcohol sa kamot, magsuot sa face mask ug face shield, ug kanunay mga modistansya gikan sa ubang tao.

###