Press Release No. 51 | February 23, 2021

HISGUTAN sa Provincial Government of Bukidnon, pinaagi sa Provincial Task Force on Infectious and Contagious Animal Diseases, ang mga gitumbok nga priority areas sa pagpatuman sa mga kamanduan ni Provincial Governor Jose Ma. R. Zubiri atol sa panagtagbo sa maong grupo karong umaabot Lunes-Marso 1, 2021 sa Kaamulan Open Theater, Kaamulan Park, syudad sa Malaybalay.

Pinasikad sa Executive Order No. 11, Series of 2021 pinitsahan Pebrero 19, 2021 ni Governor Zubiri, gihingusgan ang istriktong pagkontrol sa operasyon sa viajeros o live hog and pork products traders sa lalawigan, ingon man ang Executive Order No. 12, Series of 2021 nga nagmando sa Provincial Veterinary Office (PVO), lakip sa City/Municipal Veterinary and Agriculture Offices, ug barangay officials sa pagpahigayon sa mapadayonon nga surveillance sa mga binuhing baboy ingon man sa mga produkto sa karneng baboy alang sa sayo nga detection sa ASF sa ilang tag-tagsa ka mga area of responsibility.

Pipila sa mga priority areas nga pagatutokan sa task force mao ang mosunod: pagmontar sa IEC campaign materials diha sa entry points; pagsusi sa uniformed guidelines sa mga personahe diha sa PVSC stations sa katuyuan nga ma-inspect ang mga karga sa moagi nga salakyan, lakip ang mga pribadong sakyanan ning panahon sa emerhensya; katukoran sa paspas nga emergency response pinaagi sa Emergency Operation Center ug Incident Management Team sa probinsya; paghan-ay sa gisugyot sa Northern Mindanao Hog Raisers Association nga temporaryong pagdili sa pag-deliver sa baboy, deputization of PNP personnel gikan sa Bureau of Animal Industry-Region 10, regulation sa backyard swine raising, ug ang istriktong pagpatuman sa biosecurity sa mga namuhi ug baboy.

Subay sa EO No. 11, Section 1 – gipakanaug sa Gobernador ang tahas ngadto sa City/Municipal Veterinarians and Agriculturists sulod sa Bukidnon nga kinahanglang ipasabot sa viajeros ang 1-7-10 protocol [.5 km radius quarantine area; 7-km radius surveillance area; ug 10-km control area gikan sa posebling apektadong barangay o purok] nga gilatid diha sa Administrative Order No. 22, Series of 2020 ayha maghatag sa certificate of registration; Section 2 – ang tanang viajeros o local live hog traders kinahanglang motuman ug magparehistro diha sa City/Municipal Veterinary Office ayha sila maka-apil sa pagpamaligya ug pagpalit sa buhing baboy; Section 3 – obligasyon o responsibilidad sa mga viajeros nga sundon ang disinfection protocol diha sa PVSC stations.

Gipahinumduman usab sa Pangagamhanang Probinsyal ang pagpahamtang sa mamahimong silot ilalom sa Akta Republika 10611 o ang Food Safety Act of 2013, [Section 37. Prohibited Acts (c) (d)], alang niadtong mosupak niini nga kasugoan nga pagpalit o pagbaligy sa buhing baboy sa katuyuang pagnegosyo nga wala magparehistro ngadto sa veterinary office o ba kaha nag-operate sukwahi sa 1-7-10 protocol.

Gilauman sa Pangagamhanang Probinsyal nga pinaagi sa mas gipahugtan nga pagbantay diha sa 13 ka mga Provincial Veterinary Sanitation Checkpoints, ubos sa pag-abag sa kapulisan sa probinsya, hayan mapugngan ang pagsulod sa ASF dinhi sa Bukidnon gikan sa mga silingang probinsya ug syudad nga nag-positibo sa virus sama sa Barangays Mambuaya, San Simon, Baikingon, Buena Oro-Macasandig ug Agusan sa syudad sa Cagayan de Oro; mga lungsod sa Manticao, Initao, ug Laguindingan sa Misamis Oriental; lakip ang mga probinsya sa Davao del Norte, Davao Occidental, pipila ka bahin sa North Cotabato, Davao de Oro ug Iligan City sa Lanao del Norte province.              

###