Press Release No. 53 | February 24, 2021

GIPAHIGAYON sa Kagamhanang Probinsyal sa Bukidnon pinaagi sa Provincial Social Welfare and Development Office (PSWDO) ang screening sa Tulong Panghanapbuhay para sa ating Disadvantaged/Displaced Workers/ Graduate Internship Program (TUPAD/GIP) karong adlawa Pebrero 23, 2021 didto sa Kaamulan Open Theater, Kaamulan Park, Malaybalay City, Bukidnon.

Matud pa ni Provincial Social Welfare and Development Officer Ceferina O. Caiña nga lakip sa makabenepisyo niini ang taga-Bukidnon nga nag-edad sa 18 hangtud 75 ang pangedaron apan kinahanglan makahimo pa sa pagtrabaho ug wala magdawat sa pension. Kinahanglan aduna usab kini certificate of fitness to work nga giisyu gikan sa Local Health Unit nga ipresenta sa dili pa tugutan nga makatrabaho.

Dugang pa ni PSWDO Caiña nga sa kasamtangan, prayoridad nila ang nag-edad 18 hangtud 55 ang pangedaron sa dakbayan sa Malaybalay nga gi-endorso sa ilang mga Brgy. Kapitan gumikan kay limitado lamang ang ilang pagpangdawat ngadto sa 290 ka benepisyaryo ug isa lamang kada pamilya. Dili usab kwalipikado ang mga nakadawat na sa ₱6,000.00 nga assistance gikan sa DOLE ug kadtong mga estudyante nga naka-enroll na sa kasamtangan.

Ang madawat sa screening makatrabaho sa 14 hangtud 16 ka adlaw sulod sa 4 ka oras matag adlaw diin mo-total ngadto sa ₱6,000.00 ang kinatibuk-an nilang madawat. Kung aha ang mga benepisyaryo motrabaho sa repair and maintenance sa pampublikong mga pasilidad ug imprastraktura, rehabilitasyon sa mga farm to market roads, tulay, post-harvest facilities, agro-forestry community projects sa Bukidnon Environment and Natural Resources Office o BENRO sama sa tree planting, nursery and seedling preparation, community gardening sa pampublikong pasilidad, ug assistance sa mga LGU sama sa paghatud ug mga essential goods and services, pagpangputos sa relief goods ug pag-andam ug papanaud sa mga information and educational materials ilabi na sa rural areas.

Kini gigahinan ug mikabat sa ₱2,375,000.00 diin ang ₱1,900,000.00 gikan sa TUPAD/GID Program samtang ang ₱475,000.00 gikan sa LGU counterpart nga 20%. Ang buhatan sa DOLE maghatag usab ug Personal Protective Equipment o PPE ug jacket ngadto sa mga benepisyaryo alang sa ilang pagtrabaho.

Ang TUPAD/GIP Program ubos sa Bayanihan II Program sa Department of Labor and Employment o DOLE nga nagtumong nga mahatagan ug temporaryong trabaho ang mga anaa sa informal sector partikular na niini ang mga nawad-an ug trabaho nga mga family workers ug self-employed workers, lakip na niini ang mga out-of-school youth o ang ilang mga panginabuhian naapektuhan gumikan sa pandemya nga COVID-19.

Gipaabot usab ni Provincial Administrator Atty. Jay S. Albarece ang mensahi ni Gov. Jose Ma. R. Zubiri, Jr. sa gipahigayong hamubo nga programa nga bisan pa man nga giendorso sa ilang tagsa-tagsa ka mga kapitan ang mga benepisyaryo ma-administrasyon man o ma-oposisyon, walay pili ang pweding maka-apply basta kwalipikado lamang sa mga rekisitos nga gikatakda sa DOLE.

###