Press Release No. 54 | February 24, 2021
GIDASIG sa Provincial Government of Bukidnon, pinaagi sa Provincial Veterinary Office, ang tanang namuhi ug baboy (backyard swine raisers) sa probinsya nga kung pwede na ma-dispose ang ilang binuhing baboy, ibaligya na kini samtang wala pa makasulod sa Bukidnon ang African Swine Fever (ASF), sanglit anaa na sa utlanan sa probinsya ang nag-positibo na sa maong virus.
Gipasabot ni Dr. Nancy V. Diez, ang Provincial Veterinary Officer, nga kini aron mapuslan nila ang ilang gihaguang pagbuhi sa mga baboy ug mahalin pa sa taas nga presyo tungod luwas pa man kini gikan sa ASF. Alang sa mga backyard swine raisers sulod sa Bukidnon nga gusto nang mamaligya sa ilang binuhing baboy, gikinahanglang lamang mokuha sa Veterinary Health Certificate gikan sa City Veterinary Office o Animal Inspection Certificate gikan sa Livestock Coordinators sa mga munisipyo. Alang niadtong buot mobaligya sa ilang binuhing baboy gawas sa Bukidnon, magdugang lamang sa pagkuha sa shipping permit gikan sa Bureau of Animal Industry – National Veterinary Quarantine Service nga ania mag-opisina sa Provincial Veterinary Office sa Capitol Compound, syudad sa Malaybalay, ug magbayad sa veterinary fees and charges nga ₱10/head sa baboy, subay usab sa napalabang nga Provincial Revenue Code sa Bukidnon.
Gihangyo usab ni Dra. Diez ngadto sa mga namuhi ug baboy nga pahugtan ang ilang biosecurity measures, bisan ug tumanon lamang niini ang basic protocol nga buhatan sa tangkal ug koralon ang ilang baboyan; dili magpasulod ug bisan kinsa sa ilang baboyan; ug magpahimutang sa footbath alang sa disinfection diin epektibo na nga magamit sa chlorine aron makapanalipod gikan sa virus.
Dugang hangyo sa Provincial Veterinary Officer ngadto sa tanang backyard swine raisers nga mo-participate sa gilusad nga Bantay ASF sa Barangay ug dili mahadlok kung maanhaan sa nagpahigayon sa inventory tungod kay gihimo kini aron ma-monitor ang ilang hayopang baboy.
Pipila sa mga preventive and security measures ang gihimo sa Pangagamhanang Probinsyal sa Bukidnon sa pakigbatok niini kontra ASF diin gilusad sa PVet karong adlawa-Pebrero 24, 2021, ang Bukidnon Livestock Extension Workers Meeting sa Bukidnon Breeze, Sumpong nga gitambongan sa City/Municipal Veterinarian ug Municipal Livestock Coordinators kung aha hisgutan ang mga sukaranang balaod sa pagpatuman preventive and security measures sa probinsya, ingon man maglusad usab sa workshop kung unsa ang angayang buhaton kung mosulod man ang outbreak sa Bukidnon.
Gawas niana, gipalugwa na usab ni Acting Provincial Governor Rogelio N. Quiňo ang sulat-hangyo ngadto kang acting provincial director Police Colonel Jun Mark J. Lagare, Bukidnon Police Provincial Office alang sa deployment sa uniformed police personnel sa labing dali nga panahon ngadto sa PVSC stations sa Manolo Fortich [Alae, Piligayon, ug Mantibugao]; Gango, Libona; Nicdao, Baungon; ug San Isidro, Talakag nga polos mga boundary barangays sa Bukidnon gikan sa silingang syudad sa Cagayan de Oro.
Alayon niini, kusganong gihangyo sa pangagamhanang probinsyal ang tanang katawhan nga magtinabangay kita sa pagbantay batok sa ASF. Kung adunay makita nga binuhing baboy nga gibiyahe pasulod sa atong probinsya, diretso nga i-report niining mga hotline numbers sa Provincial Veterinary Office 0917-310-7439 ug PGO-Provincial Disaster Risk Reduction and Management Division 0917-765-9016.
###