Press Release No. 57 | February 26, 2021

PADAYON ang hugot nga pagdili sa Pangagamhanang Probinsyal sa Bukidnon nga makasulod sa lalawigan ang mga processed goods o frozen meats nga gigama gikan sa karneng baboy, sama sa chorizo, longganisa, ham ug bacon, aron kalikayan nga makalusot ang African Swine Fever (ASF) virus, kung aha pipila na sa mga boundary barangays sa probinsya ang nagpositibo sa maong sakit sa baboy.

Gipasabot ni Dra. Scarlet V. Soriano, sa Bureau of Animal Industry – Veterinary Quarantine Services Region 10 (BAI VQS R10) nga basi sa data sa Food and Agriculture European Food Authority, ang ASF virus mabuhi sa frozen meat sulod sa 1,000 days, chilled meat- 105 days, salted meat-182 days, smoked &  deboned meat- 30 days, dried meat- 300 days, skin/ fat (dried)- 300 days, offal’s- 105 days, refrigerated blood- 6 years, blood stored at 37°C- 1 month ug mamatay lamang kini kung lutuon ang karneng baboy sulod sa 30 minutos ubos sa 70 degree celsius nga kainiton.  Mabuhi usab ang virus sa hugaw o tae sa baboy sulod sa 80 ka adlaw, 45 ka adlaw sa ihi ug 30 ka adlaw sa kontaminadong tangkal.

Gibutyag usab ni Dra. Soriano nga ang ASF dali nga motakod ug mukoyanap ug sa kasamtangan wala pay bakuna o tambal nga nadiskubre dinhi, kung aha ang binuhing baboy pwedeng makatakod ngadto sa ubang baboy sulod sa 24-hangtud 48 oras sa dili pa kini makit-an ug mga sintomas ug adunay 100% ang pagkamatay sa baboy.

Alayon niini, gidasig sa Provincial Veterinary Office ang 464 ka mga Punong Barangay sa probinsya nga magtukod sa ilang Bantay ASF sa Barangay ug hugot nga ipatuman ang mga gitakda nga balaod alang sa katuyuan nga dili gayud makasulod sa Bukidnon ang ASF. Alang usab sa mga backyard swine raisers o sa mga namuhi ug baboy, pahugtan gayud ang ilang basic biosecurity protocol sa ilang farm.

Ang Pangagamhang Probinsyal nangandam sa posebling outbreak diin pinaagi sa Provincial Veterinary Office (PVet) mihimo ug workshop/action plan aron makamugna sa hiniusa nga mga aksyon/plano, kalihukan ug mga pamaagi diha sa syudad og mga munisipyo.

Subay sa ulahing kasayuran nag-positibo ang boundary barangays sa Macasandig, Mambuaya, San Simon, Baikingon, Agusan, Upper Puerto, Tablong ug Patag sa Cagayan de Oro ug karong bag-o, nagpositibo usab ang lungsod sa Loreto, Agusan del Sur nga boundary usab sa Cabanglasan, Bukidnon diin gikinahanglan ang katawhan magmaigmat sa tanang panahon og pag taho gilayon sa gitukod nga hotline numbers sa Provincial Veterinary Office 0917-310-7439 ug PGO-Provincial Disaster Risk Reduction and Management Division numero 0917-765-9016.

###