Press Release No. 58 | March 1, 2021

GIILA sa Bureau of Animal Industry – Veterinary Quarantine Services Region 10 (BAI VQS R10) ang dakong kontribusyon sa mapadayonon nga Provincial Veterinary Sanitary Checkpoints (PVSC) sa Pangagamhanang Probinsyal sa Bukidnon alang sa paningkamot nga babagan ang pagsulod sa African Swine Fever (ASF) gikan sa mga silingang syudad ug probinsya nga nag-positibo sa virus, dungan sa gipahigayon nga Provincial Task Force on Infectious and Contagious Animal Diseases in the Province of Bukidnon Meeting sa pagpanguna ni Governor Jose Ma. R. Zubiri, Jr., kaganihang buntag-Marso 1, 2021 sa Kaamulan Open Theater, Kaamulan Park, syudad sa Malaybalay, Bukidnon.

Gibutyag ni Dr. Jorge Magzalay, Jr., Veterinarian III sa BAI-VQS Region 10 nga dakong kontribusyon nganong nagpabiling negatibo ang Bukidnon sa ASF tungod sa katukoran ug hugot nga pagbantay sa tanang entry points niini pinaagi sa PVSC stations, nga mao usab ang nakita nila nga kakulangon sa ubang probinsya. Dinhi mas gipahugtan ang pakiglambigit sa mga barangay, mga lungsod ug syudad, ilabi na ang anaa sa mga utlanang bahin sa probinsya, subay sa pagpatuman sa Bantay ASF sa Barangay.

Subling gidasig ni provincial administrator Atty. Jay S. Albarece ang mga empleyado sa probinsya, uban sa kapulisan nga anaa magbantay sa PVSC stations nga bantayan gayud ang mga salakyan nga mosulod sa Bukidnon, ug pangotan-on ang mga motorista, ilabi na sa mga pribadong sakyanan, kung unsa ang ilang karga ug ipahibalo nga bawal ang pagpasulod sa baboy, karneng baboy, ug mga produkto nga gama sa baboy. Gipakisayud usab nga adunay Ordinansa Numero 97-02 pinitsahan Oktobre 28, 1997 o mas naila nga Veterinary Sanitation Ordinance of Bukidnon nga mamahimong magpahamtang ug silot niadtong molapas dinhi.

 Gipadangat usab ni Northern Mindanao Hog Raisers Association (NorMinHog) President Leon Tan, Jr. nga aron maminusan ang risgo nga makasulod ang ASF, gisugyot niini ang pag-pagpatay o pag-depopulate sa tanang binuhing baboy o backyard hog raising. Subo matud pa nga hunahunaon apan sa tibuok nasud, ang tanang outbreak sa ASF nagsumikad sa backyard raising sa rason nga ginabahugan kini sa pasaw (swill feeding). Kini matud pa ang pro-active nga solusyon nga mao ang pagpahunong sa pagpamuhi sa baboy. Dili matud pa kini anti-poor tungod kay kung available na ang ASF vaccine alang sa hayopang baboy, makapamuhi naman sila ug balik.

Gipasabot usab ni Atty. Albarece nga dako pang hisgutanan ang maong sugyot sa NorMinHog, apan mihimo na ang probinsya sa pag-aghat sa mga namuhi ug baboy nga kung pwede na ma-dispose ang ilang mga binuhi, ibaligya na kini aron kapahimuslan pa nila ang binuhing baboy samtang luwas pa sa ASF ang probinsya.

Gipasalig ni Governor Zubiri ang ₱1.5-Million nga tabang-pinansyal alang sa swine industry ning panahon sa pandemya nga hatud sa ASF.

          “Dili ko gusto nga madaut ang industriya kay daghan ta’ng mga gagmay’ng farmers diha… I will support you all the way! Ang ako lang, bantayan gyud nga dili makasulod ang virus”, pamahayag ni Governor Zubiri ngadto sa Task Force on Infectious and Contagious Animal Diseases sa probinsya.   

Alang sa padayong pagbantay, i-report dayon kung adunay mamatikdang pagpasulod sa binuhing baboy pinaagi sa hotline numbers sa Provincial Veterinary Office 0917-146-9223 ug sa PGO-Provincial Disaster Risk Reduction and Management Division 0917-765-9016.

###