Press Release No. 59 | March 2, 2021

MIPADANGAT sa iyang dakong pagpasalamat si Provincial Governor Jose Ma. R. Zubiri, Jr., pinaagi kang provincial administrator Atty. Jay S. Albarece ngadto sa Department of Information and Communications Technology (DICT) sa pagmontar sa 99 ka mga access points sa Free Wi-Fi alang sa 44 ka mga local sites diha sa mga lungsod ug syudad, atol sa Virtual Launch of Bukidnon Free Wi-Fi for All Sites kaganihang buntag-Marso 2, 2021 via teleconferencing platform gamit ang Zoom app ug nakita usab sa live streaming sa official Facebook account sa DICT Region 10.

Sa mensahe nga gipadangat ni Atty. Albarece, dungan nga nakigsaulog sa maong kalampusan sa nasudnong ahensya ang pangagamhanang probinsyal pinaagi sa pag-ila sa kamahinungdanon ug tukma nga katukoran sa Free Wi-Fi sites dinhi sa probinsya sa Bukidnon, ilabi na ning panahon sa pandemya nga sobrang nakaapekto sa inadlaw-adlaw nga pagtrabaho sa matag usa kung aha ang kadaghanan sa mga transaksyon diha na sa online platforms nga nagkinahanglan ug internet connectivity. Karon ang internet access dili na makunsidera nga pribilihiyo sa pipila apan mapahimuslan sa tanang nanginahanglan sa trabaho, edukasyon, negosyo, sa gobyerno ug uban pa.

 Ang maong proyekto sa DICT nagsumikad sa Akta Republika Numero 10929 nga naila nga Free Internet Access in Public Places Act. Sa Bukidnon, anaa ang hotspots sa 19 ka mga LGUs [Baungon, Cabanglasan, Damulog, Dangcagan, Don Carlos, Kadingilan, Kalilangan, Kibawe, Kitaotao, Libona, Malaybalay City, Malitbog, Manolo Fortich, Maramag, Pangantucan, Quezon, San Fernando, Sumilao ug Talakag], diha sa plaza, mga tunghaan, balay tambalanan, ug sa administrations buildings.

Malipayon ang gobernador sa 44 ka mga public Wi-Fi hotspots, hinuon gihangyo niini ang departamento nga unta mapakusgan pa ang internet speed sa mga natukod nga hotspots, magtukod sa mas daghan pa nga sites aron mas mapalapdan ang ilang coverage ug hingpit makab-ot sa kadaghanan ang free wi-fi alang sa gitinguha nga “Internet for All” sa Philippine Digital Strategy. 

###