Press Release No. 60 | March 3, 2021

NAGPATABANG ang Philippine Red Cross (PRC) – Bukidnon Chapter, pinaagi ni Administrator Jocelyn A. Daroy sa Sangguniang Panlalawigan (SP) nga modasig sa katawhan alang sa blood donation activities aron madugangan ang stock / supply sa dugo, atol sa pag-atubang niini sa SP human gipatawag ni Board Member Ranulfo Pepito aron ipasabot ang proseso o protocol sa paghatag sa dugo ngadto sa mga nanginahanglang pasyenti kagahapong adlawa-Marso 2, 2021 sa SP Session Hall, Legislative Building, Capitol Compound, Malaybalay City, Bukidnon.

Gipadayag ni Ms. Daroy nga miagi gyud ang panahon nga sobrang ubos ang supply sa dugo unya taas ang ihap sa nagkinahanglan niini diin nag-require sila niadtong dili dinalian ang kaso nga magdala gayud ug blood donor. Kini gumikan sa nasinati nga pandemya hatud sa COVID-19 kung aha gidid-an ang kadaghanan sa pagawas-gawas sa ilang mga panimalay ug ang kausaban sa sistema sa pagtungha sa kabatan-onan, sanglit kasagaran sa mga blood donors mao man ang mga estudyante.

Sugod sa bulan sa Enero 2021, medyo naluagan ang polisiya sa mga LGU diha sa protocols batok sa COVID-19, hinungdan nga hinay-hinay usab sila nga nakapahigayon sa bloodletting activities, sama sa mga lungsod sa Sumilao ug Cabanglasan. Tungod niini, mipaabot si Ms. Daroy ngadto sa SP nga unta matabangan sila nga madasig ang katawhan nga magdonar ug dugo aron adunay ikatunol kung adunay manginahanglan, labi na ang mga dialysis ug cancer patients, gawas pa sa emergency cases nga angayang diha-diha matunol ang gikinahanglang dugo aron maluwas ang kinabuhi.

Gipakisayud usab niini nga nagsunod ang PRC sa DOH program, subay sa Akta Republika Numero 7719 o National Blood Services Act of 1994 nga nagtumong sa pagpahibalo sa publiko sa kamahinungdanon sa pagpasiugda sa donasyon sa dugo aron makahatag sa igong supply ug luwas nga dugo sa tinguha nga maluwas ang milyon-milyong kinabuhi sa Pilipino.

 Sa kasayuran nga gipadangat sa PRC-Bukidnon Chapter Administrator, alang sa interesadong hugpong o grupo nga mag-donate sa dugo, kinahanglan lamang nga dili mominus sa 50 kilos ang timbang sa blood donor, nag-edad 18 anyos pataas ug kung 16 o 17 anyos gikinahanglan ang guardian consent, wala mag-inom sa ilimnong makahubog sulod sa 24 oras, ug kung adunay tattoo angayang usa ka tuig na ang nakalabay gikan sa pag-tattoo. Mohimo lamang nga mopaabot sa request letter ngadto sa ilang opisina aron ipahigayon ang schedule o ba kaha mokontak sa numero 0917-896-0367 ug sa email address bukidnon@redcross.org.ph. Gisiguro usab ang pagpatuman sa minimum public health protocols sama sa pagkuha sa body temperature sa blood donors, paghugas o pag-alcohol sa kamot ug pagmintina sa distansya gikan sa ubang tao.   

###