Press Release No. 61 | March 4, 2021

KANSELADO sa gihapon ang Kaamulan Festival sa Bukidnon alang ning tuig 2021 gumikan sa nagpabiling hulga sa COVID-19 pandemic kung aha anaa pa gihapon sa Community Quarantine ang classification sa probinsya, base sa deklarasyon sa Inter-Agency Task Force (IATF).

Ang kanselasyon pinasikad sa Advisory nga gipagula ni Provincial Governor Jose Ma. R. Zubiri, Jr. pinitsahan Marso 4, 2021, bisan pa man ug bug-at sa dughan niini ang pagpahibalo sa pagkansela sa maong kasaulogan, apan mas gihatagan ug gimbug-aton sa gobernador ang kahimsog sa publiko ug kaluwasan sa mga tao ning panahon sa pagsulay. Angayang seryosohon ang pagkibatok sa virus busa angayang magpabiling mabinantayon ug obserbahan sa kanunay ang minimum public health protocols nga gitakda sa Department of Health.

 Ang Probinsya sa Bukidnon, sukad sa katukoran niini niadtong tuig 1914, kanunay nga nagasaulog sa Kaamulan matag tuig, kung aha magtigum ang pito ka tribu sa lalawigan isip kabahin sa tradisyon aron ipakita ug ipasundayag ang lain-lain ug buhi nga kultura sa Bukidnon.

Mahinumduman nga sa milabay’ng tuig 2020, sa pagtumaw sa COVID-19 virus, diha-diha nga gikansela ni Governor Zubiri ang Kaamulan aron kapugngan ang pagkaylap sa COVID-19 sa probinsya, uban sa paglaum nga ang hulga nga dala sa virus mawagtang na sa labing dali nga panahon.

 Gipanghinaut ni Provincial Governor Zubiri ang kooperasyon ug pagsabot sa katawhan sa gipagulang tambag aron pabilin nga luwas ang tibuok banay gikan sa peligrosong COVID-19, kanunayon ang pagsuot sa face mask, maghugas o mag-alcohol sa kamot, ug modistansya gikan sa ubang tao.

###