Press Release No. 64 | March 8, 2021

NAGPAHINUMDUM ang Pangagamhanang Probinsyal sa Bukidnon, pinaagi sa Provincial Treasurer Office nga kutob na lang sa Marso 31, 2021 ang pagbayad sa Real Property Tax (RPT) nga adunay diskwento nga dyes (10) porsyento, subay sa Revenue Code of the Province of Bukidnon.

          Sa data gikan ni Provincial Treasurer Marilou S. Bueno, mas makabentaha ang tax payers kung bayran ang kinatibuk-ang kantidad sa buhis sa ilang real properties sulod ning kasamtangang tuig. Kung ang first quarter ning tuig 2021 lang ang bayran sa magbubuhis, makadiskwento gihapon ug 10%, apan ang mosunod nga 2nd, 3rd ug 4th quarters, wala naý diskwento nga mahatag dinhi. Ang nahisgutan nga diskwento mahatag lamang kung ang mga real properties walay palta ang pagbayad sa bulohisan.

          Base sa Provincial Revenue Code, ang first installment sa RPT payment gitakda on or before March 31; second installment on or before June 30; third installment on or before September 30; ug fourth installment on or before December 31. Kung magbayad ang magbubuhis sa ilang RPT sa Disyembre 31 matag tuig alang sa advance payment sa ilang bulohisan sa mosunod nga tuig, 20% discount ang ilang makuha.

          Ilawom sa Akta Republika Numero 7160, ang usa ka probinsya mahimo nga magpahamtang sa buhis sa real properties sa mga kabtangan sama sa yuta, gambalay (buildings), machineries and other improvements.

          Aron makabayad sa bulohisan sa real properties, mamahimong buhaton ang transaksyon sa Provincial Treasurer Office dinhi sa Capitol Compound, syudad sa Malaybalay, Bukidnon, dal-on lamang sa pinaka-ulahi nga resibo sa pagbayad, Lunes hangtud Biyernes, alas 8 sa buntag kutob alas 4 sa hapon. Mahimo usab nga magbayad sa inyong Municipal Treasurer’s Office. Paningkamotan nga mabayran ang bulohisan sa gitakda nga panahon aron malikayan nga ma-delikwenti ug ma-imbargo sa gobyerno ang ilang mga kabtangan.

###