Press Release No. 67 | March 8, 2021

SUBLING mipadangat sa pagdasig ang Provincial Government of Bukidnon (PGB), pinaagi sa Provincial Task Force on Infectious and Contagious Animal Diseases (PTF-ICAD) sa tanang namuhi ug baboy, ilabina ang anaa sa mga utlanang barangay sa lalawigan nga ibaligya na ang ilang mga gibuhi nga mga baboy aron mahalin pa kini sa mas taas nga presyo, samtang nagpabilin nga negatibo ang Bukidnon gikan sa African Swine Fever (ASF), atol sa gihimong panagtagbo sa PTF-ICAD nga gipangunahan ni provincial administrator Atty. Jay S. Albarece, kauban ni Provincial Veterinarian Nancy V. Diez, dili pa lang dugay-Marso 8, 2021 didto sa PPDO Conference Room, Capitol Compound, syudad sa Malaybalay.

          Kini ang migula nga rekomendasyon ni Dr. Scarlet Soriano, Veterinarian III sa Bureau of Animal Industry – Veterinary Quarantine Services Region 10 (BAI VQS R10), kung aha tukmang aksyon matud pa kini nga pagabuhaton samtang pwede pa nga mahalin ang mga binuhing baboy sa mas taas nga presyo. Dili na usab malakip sa indemnity charges ang ilang mga binuhi nga bugtian lamang sa mas ubos nga kantidad gikan sa lokal nga kagamhanan ug dili na motakboy o masabwag ang makatakod nga sakit sa kahayopang baboy tungod kay wala na’y mahimong host o taptan sa virus.

          Kini nga pamaagi ang usa sa gitutokan karon sa PTF-ICAD, ilabi na niadtong mga backyard hog raisers nga walay biosecurity measures, sama sa pagbutang ug tangkal ug koral sa ilang baboyan; dili magpasulod ug bisan kinsa sa ilang tugkaran; ug nagpahimutang sa footbath alang sa disinfection o footbath aron makapanalipod gikan sa virus. Gipaningkamotan usab nga mapagula sa labing dali nga panahon ang kamanduan gikan kang Governor Jose Ma. R. Zubiri, Jr. alang sa katukoran sa Incident Command Center sa LGus ug sa kabarangayan niini aron kanunay nga andam kung mahitabo nga mag-positibo ang resulta sa active surveillance batok ASF.

          Sa mga interesado magbaligya sa ilang mga gibuhing baboy, magkuha lang ug Veterinary Health Certificate gikan sa City Veterinary Office o Animal Inspection Certificate gikan sa Livestock Coordinators sa mga munisipyo, ug kung ibaligya kini gawas sa Bukidnon, magdugang lamang sa pagkuha sa shipping permit gikan sa Bureau of Animal Industry – National Veterinary Quarantine Service nga ania mag-opisina sa Provincial Veterinary Office sa Capitol Compound, syudad sa Malaybalay, ug magbayad sa veterinary fees and charges nga ₱10/head sa baboy, subay usab sa napalabang nga Provincial Revenue Code sa Bukidnon.

          Giklaro ni provincial veterinarian Dr. Nancy Diez nga nagpabiling luwas gikan sa ASF ang Bukidnon, samtang gipasalig usab sa kapulisan, nga usa sa mga miyembro sa task force, nga andam sila mobantay alang sa siguridad batok sa ASF diha sa 13 ka mga PVSC stations, ilabi na sa boundary checkpoints. Alang sa padayong pagbantay, i-report dayon kung adunay mamatikdang pagpasulod sa binuhing baboy pinaagi sa hotline numbers sa Provincial Veterinary Office 0917-146-9223 ug sa PGO-Provincial Disaster Risk Reduction and Management Division 0917-765-9016.

###