Press Release No. 66 | March 8, 2021

GISUGDANG gibakunahan batok COVID-19 gamit ang Sinovac vaccine ang mga personahe sa Bukidnon Provincial Medical Center (BPMC)- Bukidnon COVID Center, karong adlawa, Lunes, Marso 8 og matapos sa adlaw nga Merkules, Marso 9, 2021, diha sa BPMC, Casisang, Malaybalay City, Bukidnon.

Sa ceremonial vaccination, unang gibakunahan sa Sinovac vaccine ang hepe sa BPMC nga si Dr. Miguel Antonio C. Prantilla, FPSMS, FICS, inubanan ni Dr. Jose L. Aguirre, DPCP, department chairperson of internal medicine og ni Dra. Marbe Joy A. Depayso, DPCCP, FPM, interim chief of clinics diin kini gisundan sa ubang mga doctors, nurses og staff sa BPMC nga gilantaw nga kumpletong mabakunahan ang 530 ka mga frontline health workers sulod sa tulo ka adlaw.

Gibutyag ni Dr. Prantilla nga boluntaryo ang pagpabakuna sa Sinovac vaccine ug moagi kini sa hustong proseso sama sa registration, counselling, screening, vaccination og post vaccination monitoring. Diin, obserbahan kini sulod sa 30 ka minutos hangtud sa isa ka oras kung adunay reaksyon sa panglawas. Basi sa gihatag nga orientation, dili bakunahan ang mga buros og nagplanong magbuntis, usab ang ubos sa 18 anyos ug sobra sa 59 anyos ang pangedaron ug niadtong adunay mga allergy sa maong bakuna. Mapasalamaton si Dr. Prantilla sa pag-abot sa maong bakuna og nahiapil sa prayoridad ang BPMC- Bukidnon COVID-19 Center.

Mipaabot usab sa mensahi ni OIC DOH Region-10 regional director Dr. Ellenietta HMV N. Gamolo, MPH, CESE si chief administrative officer Mr. Edward D. Acta, CPA, MBA, REB nga gipaniguro niini sa publiko nga ang maong bakuna aprobado sa Food and Drugs Administration pinaagi sa Emergency Used Authorization (EUA). Ang Sinovac vaccine matud pa girekomenda nga bakuna sa National Immunization Technical Advisory Group (NITAG) isip luwas nga bakuna batok sa COVID-19 sa mga nag-edad 18 hangtud 59 anyos ang pangedaron. Gibasa usab niini ang mensahi ni Chief Implementer of the Philippines’ Declared National Policy Against COVID-19 ug vaccine czar Secretary Carlito G. Galvez, Jr. nga prayoridad sa alokasyon sa bakuna batok sa COVID-19 ang anaa sa mga high risk ug high exposure sa tanang rehiyon gumikan sa kakulangon nga suplay niini. Gidasig usab niini ang tanang fronliners ug health workers nga dili sayangon ang oportunidad sa pagpabakuna aron mabatukan ang COVID-19.

Mapasalamaton usab si provincial administrator Atty. Jay S. Albarece nga nagrepresenta kang Gov. Jose Ma. R. Zubiri, Jr. ngadto sa national government, DOH ug DILG sa tanang health workers ug frontliners sa pag-abot sa bakuna gumikan kay nahatagan na ug kahayag ug paglaum ang pagbatok sa COVID-19 ug 90% niini nga mga empleyado sa BPMC ang mopahigayon sa pagpabakuna sa maong vaccine. Mipaabot usab si Atty. Albarece sa dakong pagpasalamat ni Gov. Zubiri ngadto sa tanang health workers ug frontliners ug sa mga empleyado sa BPMC nga nagsakripisyo aron mahatagan ug atensyon ang natakbuyan sa maong virus. Malipayon usab kini kay maminusan na ang kabalaka sa mga fronliners ug health workers sa probinsya gumikan sa maong bakuna. Nanghinaut usab si Atty. Albarece nga magpadayon ang maong pagpamakuna ug sa umaabot mobalik na sa normal ang pagpanginabuhi sa mga katawhan.

Lakip nga misaksi sa maong pagpamakuna si provincial health officer Dr. Gary Guido Tabios, Dr. Vincent C. Raguro- development management officer V sa DOH-Bukidnon, DILG city local government operations officer Ms. Maria Maida Daniot, provincial disaster risk reduction and management officer IV Mr. Israel Johan M. Damasco, mga representante sa DOH Region 10, city health officers sa dakbayan sa Malaybalay ug Valencia, ug mga representante sa 403rd Brigade Philippine Army.

###