Press Release No. 68 | March 10, 2021

MIGULA nga Top 2 ang Probinsya sa Bukidnon sa bag-o lang nga resulta sa Highest Nominal Locally Sourced Revenues sa Bureau of Local Government Finance (BLGF) alang sa tuig 2019, pinaagi sa gipagula nga Memorandum Circular No. 006-2021 pinitsahan Pebrero 23, 2021 aron ipakisayud ug maila ang National Top Performing Provinces, Cities and Municipalities sa Local Revenue Generation sa tuig 2019.

Subay sa maong memorandum, migula nga Top 5 Highest Nominal Locally Sourced Revenues sa tuig 2019 sa kinatibuk-ang 81 ka mga probinsya sa nasud, mao ang mosunod: 1. Rizal Province nga nakatala sa Locally Sourced Revenue Collection nga ₱1,246.16-Billion; 2. Bukidnon – ₱844.28-Million; 3. Bataan – ₱834.06-Million; 4. Batangas – ₱781.84-Miliion; ug ikalima ang Bulacan – ₱679.22-Million.

Sumala ni Provincial Treasurer Marilou S. Bueno, kini nagpasabot nga taas ang performance sa koleksyon sa tanang taxes, fees and charges sa Bukidnon, subay sa natakda sa Revenue Code sa probinsya. Gawas kini sa Internal Revenue Allotment sa nasudnong pangagamhanan ug uban pang bahin sa nasudnong bahandi sa Pilipinas.

Gipasalamatan ug dako sa Provincial Treasurer ang aktibo ug hands-on nga liderato ni Provincial Governor Jose Ma. R. Zubiri, Jr. rason nga nakab-ot sa ilang buhatan ang maong kadungganan sa paghimo sa ilang tahas nga pagkolekta sa bulohisan sa probinsya.

Ang fourth quarter sa tuig 2019 nga electronic Statement of Receipts and Expenditures (sSRE) reports nga gisumite sa Local Treasurers, as of June 30, 2020, pinasikad sa BLGF Memorandum Circular No. 011-2020 pinitsahan Mayo 20, 2020, ang evaluation sa eSRE gihimo sa Local Finance Data Analysis Division ug dugang napamatud-an sa hingtungdan nga BLGF regional office.

Lakip nga natala usab sa maong memorandum circular, ang lungsod sa Manolo Fortich isip number 9 sa Top 10 Municipalities sa Year-on-Year Growth sa Locally Sourced Revenues.

 Mahinumduman nga napabilin usab sa Probinsya sa Bukidnon ang ika-lima nga spot sa pinaka-labing adunahan nga probinsya sa tibuok nasud Pilipinas, sumala sa gipagawas sa Commission on Audit (COA) nga 2019 Annual Financial Report, kung aha nakatala kini sa ₱18.294-Billion nga total assets.

###