Si Provincial Governor Jose Ma. R. Zubiri, Jr. atol sa presentation sa National Rice Program nga i-implementa dinhi sa Bukidnon, pinaagi sa Department of Agriculture Bukidnon Provincial Operations Center, uban sa Provincial Agriculture Office sa probinsya, niadtong Marso 11, 2021 sa Provincial Governor’s Office, Capitol Compound, syudad sa Malaybalay.

Press Release No. 70 | March 11, 2021

GIILA nga usa sa kinse (15) ka mga probinsya sa nasud ang Bukidnon sa pilot provinces alang sa Department of Agriculture (DA) nga pagpatuman sa National Rice Program (NRP) nga nagtinguha sa pagpalambo sa lebel sa abunda ug mabungahong ani sa humay, atol sa pagpresenta ni Agricultural Center Chief Janet D. Lopez, DVM sa DA-Bukidnon Provincial Operations Center ngadto kang Governor Jose Ma. R. Zubiri, Jr. sa NRP projects uban nila Jasmine Reyes sa Philippine Rice Research Institute (PhilRice), ug sa Provincial Agriculture Office pinangunahan ni Engr. Alson Quimba, kaganihang buntag-Marso 11, 2021 sa Governor’s Office, Capitol Compound, Malaybalay City, Bukidnon.

Sigun ni Dr. Lopez nga nag-inusara ang Bukidnon sa Mindanao region nga napili isip pilot province gumikan kay naila usab kini sa daghang mag-uuma nga nananum ug interesadong mananum sa hybrid rice, hinungdan nga undangon ang pag-implementa sa Rice Competitiveness Enhancement Fund (RCEF) program dinhi sa Bukidnon aron hulipan sa hybrid rice program, pinaagi sa NRP gumikan sa taas nga potensyal sa lalawigan. Hinuon, gibutyag ni Ms. Reyes sa PhilRice nga sukad nga gisugdan ang RCEF program dinhi sa probinsya gikan sa September 2020, nakatigayon kini sa tulo ka mga cropping seasons ug gibana-bana nga anaa sa 10-15% increase sa ani kada ektarya ang nakuha sa mga mag-uuma.

Gilauman nga i-apod-apod sa DA ngadto sa registered farmers’ associations and organizations sulod ning tuig ang 55,631 bags of seeds ug 166,893 bags usab sa fertilizer nga adunay kinatibuk-ang kantidad ₱442,949,000.00 alang sa Hybrid Rice Seeds with Inorganic Fertilizer. Aduna usab 10,186 bags of seeds ug 20,372 bags of fertilizers alang sa Inbred Rice Seeds with Inorganic Fertilizer with total budget allocated ₱36,670,000.00. Gigahinan na usab ug pondo kantidad ₱13,659,000.00 ang pag-apod-apod sa Farm Production – Related Machinery and Equipment nga gilangkuban sa 109 units of seed spreader, 20 units of mechanical weeder, ug 2 units of hauling trucks; Post Harvest Machinery and Equipment: 21 units of compact rice mill, 10 units of grain collectors nga nagkantidad sa ₱10,400,000.00; pagtukod sa post-harvest facilities nga nagkantidad sa ₱14,000,000.00; ug ang small scale irrigation projects kantidad ₱1,210,000.00.

Dako ang pagpasalamat ni Provincial Governor Jose Ma. R. Zubiri, Jr. sa maong kalambuan nga hatud sa DA dinhi sa Bukidnon nga naglantaw sa kaarangan sa pagtrabaho sa umahan ug panginabuhian sa mga mag-uuma, diin gitahasan niini si Engr. Quimba nga mosumite ug proposal kung pila ang mamahimong counterpart sa probinsya alang sa fertilizers distribution for rice, kini gawas pa sa nakaandam na nga pondo kantidad ₱300-Million alang sa libreng corn seeds and fertilizers sa 55,855 ka mga mag-uuma sa mais. Kinatibuk-ang ₱518,868,000.00 ang gilaumang ma-distribute sa dili madugay sa DA nga regular program sa NRP, gawas pa kini sa naona nga distribution sa maong ahensya, pinaagi sa Postharvest Development and Mechanization (PhilMech) nga nagkantidad ug ₱513,623,000.00 nga gitunol ni Secretary William Dar ngadto sa mga benepisyaryo niadtong Pebrero 12, 2021 sa Kaamulan Open Theater, Kaamulan Park, syudad sa Malaybalay.

###