Press Release No. 73 | March 12, 2021

HUGOT ang suporta sa Provincial Government of Bukidnon (PGB), pinaagi sa pagpanguna ni Governor Jose Ma. R. Zubiri, Jr. isip chairman sa Provincial E-CLIP, alang sa katumanan sa gipalugwa nga Executive Order (EO) No. 70 ni Presidente Rodrigo R. Duterte kabahin sa pagpahimutang sa Whole-of-Nation Approach sa pagkab-ot sa malangkubon ug malungtaron nga kalinaw, pagmugna sa National Task Force to End Local Communist Armed Conflict (NTF-ELCAC), ug ang pagdumala sa pagsagop sa nasudnong gambalay alang sa kalinaw.

Kini ang punto nga gipadangat sa representante ni Governor Zubiri nga si Atty Roland F. Detecio, Legal Consultant sa probinsya, atol sa  Awarding Ceremony of Certificate of Entitlement to 100 former rebels (FRs) for Pine Ville Housing Project, kaganiha-Marso 12, 2021 sa Kaamulan Open Theater, Kaamulan Park, syudad sa Malaybalay. Dinhi pormal nang gitunol sa mga miyembro sa Provincial Task Force to End Local Communist Armed Conflict (PTF-ELCAC) ngadto sa FRs ang kaluha sa titulo sa ilang yuta nga mao ang dokumento nga magpamatuod nga sila mao ang nanag-iya sa yunit sa balay nga gihatag sa gobyerno pinaagi sa National Housing Authority (NHA).

Sigun ni Atty. Detecio nga dako ang kalipay sa gobernador sa kalampusan sa programa sa NTF-ELCAC dinhi sa Bukidnon alang sa mga kaigsoonan nga boluntaryong mibalik sa sabakan sa gobyerno gikan sa pila ka tuig nga paglihok sa walhong grupo. Gidasig ni Atty. Detecio ang mga FRs nga ipadayon ang pakighiusa sa kagamhanan aron mapahimuslan ang malungtaron nga kalinaw nga mao ang hiniusang gipaningkamotan karon sa nagkalain-laing ahensya sa gobyerno. Masinati ug hingpit makab-ot ang kalambuan sa probinsya kung anaa ang presensya sa kalinaw.

Sa maong okasyon, gipasabot ni MGen Andres C. Centino, commander sa 4th Infantry Division sa Philippine Army ang katuyuan ug proseso sa EO No. 70 ni Presidente Duterte nga tuyong tapuson ang problema sa ensurhensya sa nasud busa hugtanon ang pag-aghat sa mga lumilihok sa walhong grupo nga pahimuslan ang higayon nga gihatag kanila sa kagamhanan aron magpuyo nga malinawon uban sa ilang tagsa-tagsa ka mga pamilya.

Base sa programa sa NHA, kinatibuk-ang 250 ka mga housing units ang gipasiugdahan niini, ug ona nga matunol nga libre ang 100 rowhouse housing units dinhi sa Barangay San Jose, syudad sa Malaybalay nga adunay kaluagon sa 22 square meters floor area sa kantidad nga ₱450,000.00 matag balay, kung aha kinatibuk-ang ₱112,500,000.00 ang pondo nga gigahin sa kagamhanan alang sa maong katuyuan.

###