Press Release No. 72 | March 12, 2021
GITUMBOK sa Department of Health (DOH) ang mamahimong vaccination area batok sa COVID-19 para sa mga frontline health workers sa pampubliko ug pribadong hospital dinhi sa probinsya sa Bukidnon. Matud pa ni Bukidnon Provincial Health Office-PHO cold chain manager Eileen Shiela A. Dialimas- Nurse II nga ang DOH ang nagtumbok kung aha ipahigayon ang pagpamakuna ug gikoordinar kini ngadto sa mga hospital ug sa mga local government units. Lakip nga gikonsidera niini ang panahon sa pagpamakuna, gilay-on, ang oras ug ang gidaghanon sa mga frontline health workers sa matag hospital aron mapasayon ug mapadali ang pagpamakuna niini.
Sa lungsod sa Maramag, ang vaccination area mao ang BPH-Maramag alang sa mga frontline health workers niini lakip na ang BPH-Kalilangan ug St. Joseph Southern Bukidnon Hospital diin kauban niini ang Bongcas Holy Child Hospital, Central Mindanao University, Pangantucan Medical Hospital ug Pangantucan Doctors Hospital. Sa Don Carlos ipahigayon sa Don Carlos Doctors Hospital lakip na ang Simbulan Sto. Niňo Hospital ug mga hospital sa Quezon lakip ang St. Claire Hospital, Dr. Alberto M. Pastor Hospital, St. Ann Medical Hospital ug Maraat Medical Hospital.
Sa lungsod sa Kibawe ipahigayon sa BPH-Kibawe lakip ang Ermavi Hospital. Sa Malaybalay City ipahigayon kini sa Bethel Baptist Hospital lakip ang St. Jude Thaddeus General Hospital ug sa Malaybalay Polymedic General Hospital kauban ang Malaybalay Medical Hospital Care.
Sa dakbayan sa Valencia, ipahigayon kini sa Valencia City Gymnasium lakip niini ang Medidas Medical Center, Inc., Esther Hospital, Valencia Medical Hospital, Abella Midway Hospital, Blanco Doctors Hospital ug mga health workers sa BPH-San Fernando ug Gonzalez Medical-Surgical and Birthing Clinic. Samtang magpahigayon sa ilang pagpamakuna sa ilang tagsa-tagsa ka hospital ang Valencia Polymedic General Hospital, La Viňa General Hospital, Inc. ug Adventist Medical Center gumikan sa kadaghan sa ilang mga health workers.
Sa Manolo Fortich, ipahigayon kini sa BPH-Manolo Fortich lakip ang Phillips Memorial Hospital. Ang BPH-Talakag mopabakuna didto sa J.R. Borja Hospital sa dakbayan sa Cagayan de Oro samtang ang BPH-Malitbog didto sa Tagoloan Polymedic General Hospital.
###
