Press Release No. 74 | March 16, 2021

EMOSYONAL ug wala damha ni Bukidnon Provincial Governor Jose Ma. R. Zubiri, Jr. nga makadawat kini ug pasidungog gikan sa Sangguniang Panlalawigan (SP) nga nag-ila sa liderato niini sa pagdumala sa Pangagamhanang Probinsyal, kung aha ubay-ubay nga mga kadungganan ang naangkon sa lalawigan gikan sa nasudnong pangagamhanan, pinaagi sa nagkalain-laing ahensya sa gobyerno, karong hapon-Marso 16, 2021 dungan sa regular session sa SP.

Mituhop sa kasing-kasing sa gobernador ang gibasa nga unod sa Resolution No. 2021-2214(26th SP) nga naaprobahan atol sa ika-75 nga regular session sa SP niadtong Enero 26, 2021, diin ayha pa natunol ngadto kang Governor Zubiri gumikan sa ka-busy sa schedule niini. Ang SP ug ang katawhan sa lalawigan, mapasigarbuhon, adunay prebilihiyo ug mapasalamaton alang sa mga bantog ug labing bililhong mga serbisyo nga gihatag sa Local Chief Executive sa Bukidnon.

Nalatid sa maong resolusyon ang kalampusan sa Bukidnon nga maila sulod sa duha ka sunod-sunod nga tuig, 2018 ug 2019, isip ika-lima ka pinaka-labing adunahan nga probinsya sa 81 provinces sa nasud nga nagtala sa ₱18.294 Billion nga total assets base sa COA Annual Financial Report sa lokal nga mga kagamhanan, kung aha mitubo kini sa ₱3.016 Billion sa 2019 gikan sa total assets nga ₱15.278 Billion sa 2018 nga nagpahimutang sa Bukidnon nga ika-lima sa Top 10 wealthiest province sa nasud.

Ang pag-usbaw sa bahandi sa Bukidnon nagsumikad sa gipalambo nga koleksyon sa buhis, ang mga mapadayonong paningkamot nga mapatuman ang mga programa ug proyekto sa probinsya, sama sa Bukidnon Hospital Care Services, livelihood and scholarship programs, provincial housing resettlement program, daghanang infrastructure projects and economic developments pinaagi sa hiniusang paningkamot sa tanang mga hingtungdang buhatan sa pangagamhanang probinsyal, ubos sa pagdumala ni Governor Zubiri, rason nga nagpabilin kini sa ika-lima nga pinaka-labing adunahan nga probinsya sa Pilipinas, nga naghatag kanato sa dili basta-basta nga kalampusan ug kadungganan.

Sa dakong kalipay, kinasing-kasing nga gidawat ni Governor Zubiri ang maong pasidungog dungan sa pagpaabot niini sa dakong pasalamat sa suporta nga gihatag kaniya sa mga miyembro sa SP, nga dili makab-ot sa Bukidnon ang maong kadungganan kung siya lamang usa ang naglihok ug nagtrabaho niini. Kini hiniusa nga paningkamot sa tanang opisyales sa Bukidnon, mga mayor, punong barangays, nagkalain-laing stakeholders ug ang katawhan sa kinatibuk-an. Malipayon ang gobernador nga mipaabot sa mensahe nga napakita sa tanang taga-Bukidnon nga mahimo gayud nga makab-ot ang kalampusan kung kita kinasing-kasing nga mo-alagad sa katawhang Bukidnon.

###