Press Release No. 75 | March 17, 2021

PORMAL nga gipresenta kang Bukidnon Governor Jose Ma. R. Zubiri, Jr. sa kadagkoan sa 403rd Infantry “Peacemaker” Brigade, 4ID, P.A., sa pagpanguna ni Brigadier General Ferdinand T Barandon PA, ang duha ka mga tag-as nga opisyal sa New Peoples’ Army (NPA) uban sa lima (5) ka mga kaubanan niini kaganihang buntag-Marso 17, 2021 sa Provincial Governor’s Office, Capitol Compound, Malaybalay City, Bukidnon. Kini aron pahimuslan ang programa sa Provincial Enhanced Comprehensive Local Integration Program o ECLIP, nonot sa pagtuman sa gipahugtang EO No. 70 ni Presidente Rodrigo Duterte nga Whole of Nation Approach.

          Ang mga mibalik sa sabakan sa gobyerno naila nga sila Armando Daluniag @Ambo/Satur/Pegan/Dario, Commanding Officer, HQF Neo, Northern Central Mindanao Regional Command ug kanhi Deputy Secretary sa Guerilla Front 89 ug Roland Lagunday @Ben Squad Leader, Squad 2, Platoon 2, HQF Neo, NCMRC. Bitbit nila ang mosunod nga mga armas: upat (4) ka M16 Rifles, tulo (3) ka AK47 Rifles, usa (1) ka M653 Rifle nga adunay M203 Grenade Launcher, usa (1) ka M653 rifle ug usa (1) ka M14 rifle, niadtong Marso 9, 2021 sa 403rd Brigade samtang ang mga pangalan sa laing lima (5) kamulo pa usab gihan-ay ang pag-profile kanila.

          Alayon niini, gimandu ni Governor Zubiri ngadto kang Provincial Social Welfare and Development Officer Ceferina O. Caiňa ang pag-andam sa immediate assistance gikan sa kagamhanang probinsyal alang sa mga surrenderees nga pagalangkuban sa usa (1) ka sakong bugas kada former rebel (FR), baynte (20) ka nagkalain-laing canned goods, ₱5,000 matag FR, gawas pa kini sa ilang madawatan gikan sa National ECLIP kung makumpleto ang mga kinahanglanon papeles sa ilang pag-surrender.

          Ang ECLIP usa ka programa nga nagtinguha sa pagtabang sa mga miyembro sa CPP-NPA-NDF ug sa Militia ng Bayan aron manumpa nga ibalik ang ilang pagka-maunongon sa gobyerno, kung aha kinatibuk-ang 896 na ka mga FRs na ang nakapahimulos niini nga programa nga gilangkuban sa regular members ug militia ng bayan, gikan sa tuig 2016 to date, base sa data gikan sa 403rd Infantry Brigade.

Sa gihimong Joint 1st Regular Quarter Meeting sa Provincial Peace and Order Council ug Provincial Anti-Drug Abuse Council kaganihang buntag, gipadayag ni Governor Zubiri nga in control ug relatively peaceful ang kahimtang sa kahusay ug kalinaw sa probinsya ug dako niya kining gipasalamatan sa pwersa sa kasundaluhan nga naglihok dinhi sa Bukidnon kinsa naningkamot nga maaghat ang mga lumilihok sa Communist Terrorist Group (CTG) nga anaa sa bukid nga mokanaug ug mobalik sa sabakan sa gobyerno aron magpuyo nga malinawon. Hugtanon usab nga gipahayag sa gobernador na kinahanglang matuman gayud ang mga gipasalig nga pagtabang sa mga FRs aron hingpit nga makab-ot ang malungtarong kalinaw ug malangkubon nga kalambuan sa probinsya sa Bukidnon.

###