Press Release No. 76 | March 17, 2021

NAGKAHIUSA sa ilang panawagan ang silingang probinsya ug syudad nga magtinabangay sa pagprotekta sa Bukidnon batok sa African Swine Fever (ASF), human nga nag-positibo ang ilang lugar sa ASF, base sa gipadangat nga kasayuran ni Dr. Samuel Joseph M. Castro, DVM, MVPH, kinsa Chairman sa National African Swine Fever Task Force, Bureau of Animal Industry, atol sa gipahigayong emergency meeting niini sa Provincial Task Force on Infectious and Contagious Animal Diseases (PTF-ICAD) nga gipangunahan nila provincial administrator Atty. Jay S. Albarece ug provincial veterinarian Dr. Nancy V. Diez, kagahapon – Marso 17, 2021  sa PPDO Conference Room, Capitol Compound, Malaybalay City, Bukidnon.

 Sa pakigpolong ni Dr. Castro sa PTF-ICAD hugot ang pagdasig niini nga ipadayon ang kusog ug hugot nga pagbantay batok sa ASF dinhi sa Bukidnon, ilabi na ang Bantay ASF sa Barangay, kung aha gisuportahan usab kini sa mga probinsya ug syudad nga iya nang nabisitahan, sama sa Misamis Oriental ug syudad sa Cagayan de Oro, lakip na ang pagdasig sa Regional Task Force batok ASF. Giila matud pa sa tanan ang importansya sa Bukidnon kabahin sa farm production sa baboyan.

Sigun ni Dra. Diez nga sa pagkakaron, dinhi lang sa Bukidnon nag-gikan ang grandparents stock nga mga baboy nga maghimo sa mga inayan (parents stock) nga adunay maayong kalidad nga ipasanay (good genetic quality breeder) aron maka-produce sa mga baktin nga ipadako aron mamahimong karneng baboy nga mapalit sa mga konsumante sa kamerkaduhan. Ang ma-produce nga fatteners mao usab ang ginapadala ngadto sa ubang probinsya aron ipasanay.   

Dinhi sa lalawigan pormal na nga natukod ang Bantay ASF sa Barangay niadtong Pebrero 12, 2021, atol sa pagbisita dinhi ni Secretary William Dar, sa Department of Agriculture. Gipaningkamotan sa Provincial Veterinary Office (PVetO) nga makakuha ug report gikan sa mga gitudlo nga Barangay Biosecurity Officers sa tuyo nga masusi ug sayo kung adunay mabantayan nga problema kalabut sa ASF. Ang early detection ug dinalian nga pag-aksyon pinaagi sa hiniusang lihok sa gitahasang task force mao ang gipaningkamotan sa probinsya sa Bukidnon.

Gipakisayud usab sa Provincial Veterinarian nga nagpabiling luwas ang Bukidnon gikan sa ASF ug aktibo ang ilang surveillance diha sa mga boundary barangays kung aha nagapahigayon sila sa blood sample extraction sa mga baboy, sa pag-abag sa Regional Office ug sa Northern Mindanao Hog Raisers Association (NorMinHog).

###