Press Release No. 77 March 18, 2021

GIBUKSAN dinhi sa Probinsya sa Bukidnon ang pinaka-unang LGU coordinated nga National Labor Relations Commission (NLRC) Satellite Office gumikan sa suporta ug pagtugot ni Gov. Jose Ma. R. Zubiri, Jr., pinaagi sa Ribbon Cutting and Soft Opening sa maong buhatan  karong adlawa – Marso 18, 2021 dinhi sa 2nd floor National and Provincial Offices Building (Old Hospital Building), Capitol Compound, Malaybalay City, Bukidnon.

Sa hamubong programa nga gipahigayon, dako ang pasalamat ni Executive Labor Arbiter Rammex C. Tiglao sa kagamhanang probinsyal, pinaagi ni Governor Jose Ma. R. Zubiri, Jr., nonot sa gipasa nga resolusyon ni kanhi board member sa unang distrito ug kasamtangang provincial administrator Atty. Jay S. Albarece nga naghangyo sa NLRC nga mabutangan ug satellite office ang probinsya.

Pamahayag ni Tiglao nga sugod karong adlawa, andam ug bukas na ang ilang buhatan ning probinsya sa pagdawat sa mga reklamo may kalambigitan sa labor o suhulan tungod kay halos tanang  mga nag-unang gimbuhaton sa NLRC mamahimo na nga maatiman sa satellite office sama sa filing o request for Single Entry Approach (SEnA), assistance under SEnA, filling of NLRC complaint, conduct of SEnA mediation, conference, conduct of mandatory conference, raffle of labor arbiters, hearing, decision, conduct of appeal, execution kung gikinahanglan ug daghan pang uban. Dugang usab niini nga duha ka mga empleyado ang mag-puli-puli sa pag-duty sa maong satellite office aron modawat sa mga kaso ug reklamo nga sila Labor Arbitration Associate Amor Lea O. Ua-o ug Administrative Assistant V Rizalie I. Ampinos. Mapasalamaton usab kini sa buhatan sa DOLE sa padayon niining pagsuporta sa ilang buhatan.

Gipahayag ni provincial administrator Atty.Jay S. Albarece, kinsa nagrepresenta kang Gov. Zubiri, sa iyang mensahe nga dako kaayo kining tabang ang satellite office aron dili na mapurwisyo nga moadto pa sa NLRC regional office sa dakbayan sa Cagayan de Oro ang mga taga-Bukidnon nga adunay problema sa labor batok sa mga kompanya nga ilang gitrabahuan. Gibutyag usab niini nga dako ug pagbati si Governor Zubiri ngadto sa katawhan sa Bukidnon, ilabi na sa hisgutanan sa labor ug iya gayod kining tagaan ug pagtagad matag reklamo nga ipaabot ngadto kaniya.

Subling gipadangat ni Atty. Albarece ngadto sa mga managers sa multinational companies nga undangon na ang child labor, kinahanglan magsunod sa hustong suhulan ug daghan pang mga lagda ug regulasyon sa pagpanarbaho.

Gibuksan ang maong kalihukan pinaagi sa pagbendisyon libot sa bag-ong opisina sa pagpanguna ni Rev. Fr. Jojo Sumastre ug gisundan kini sa cutting of ribbon nga gisaksihan ni provincial administrator Atty. Jay S. Albarece kauban ang mga kadagkuan sa maong buhatan sa pagpanguna ni Executive Labor Arbiter Rammex C. Tiglao kauban sa mga labor arbiters nga sila Ms. Joan M. Jabar-Waga, Ms. Ma. Joyce L. Seno-Kho, Ms. Jean B. Domaboc-Muñez ug Mr. Abdul-Asis U. Metmug. Mitambong usab si Department of Labor-X (DOLE) Regional Director Albert E. Gutip kauban si DOLE Bukidnon Provincial Field Office Head Raul V. Valmores, uban sa presensya sa media personalities sa Bukidnon.

###