Press Release No. 81 | March 22, 2021

MALIPAYONG gipasidunggan ni Provincial Governor Jose Ma. R. Zubiri, Jr. ang bag-ong kalampusan nga nakab-ot sa mga Indigenous Peoples (IPs) sa Bukidnon, pinaagi sa Project Epanaw Coffee Table Book (CTB) Launching and Opening of Photo Exhibit, kaganiha-Marso 22, 2021 sa Centennial Stage, Kaamulan Park, syudad sa Malaybalay, Bukidnon.

Emosyunal si Governor Zubiri sa dihang nakita nga nagkahiusa ang mga lider o datu sa pito ka tribu sa Bukidnon, uban sa pagpadangat sa mensahe niini nga tinood nga dili siya lumad dinhi sa Bukidnon apan katunga sa iyang kasing-kasing mipitik alang kanila ug hugot nga misaad nga hangtud siya buhi pa dili gayod siya mobiya sa pagpangga sa probinsya, ilabi na sa mga IPs.

Pinaagi sa maong kalihukan, gipakisayud usab ni Board Member Richard D. Macas, Provincial IPMR, nga usa kini ka dakong panghitabo alang sa IPs ug dili kini mahimong posible kung wala ang kinatibuk-ang suporta ug pagpaluyo ni Governor Zubiri.

Tuyo niini nga kalihukan nga mapakita ug mahatagan ug bili sa publiko ang tinuod ug klaro nga hulagway sa sitwasyon sa Indigenous Cultural Communities (ICCs), sa tinguha nga mahibaloan ang partisipasyon sa mga lumad alang sa kalambuan sa nasud, uban sa abunda nga lumadnong kultura.

Ang Project Epanaw Coffee Table Book (CTB) Launching and Opening of Photo Exhibit gipangunahan sa National Commission of Indigenous People (NCIP), pinaagi nila commissioner Atty Pinky Grace P. Pareja, Regional Director Ana N. Burgos, inubanan nila Governor Jose Ma. R. Zubiri Jr., Provincial IPMR Richard D. Macas, Board Member Lorenzo L. Dinlayan, Jr., City/Municipal IPMRs, mga Mayor ug representante niini, ingon man sa partner agencies and stakeholders sa probinsya sa Bukidnon. Kini mapasundayag diha sa Centennial Stage hangtud sa Abril 5, 2021.

###