Press Release No. 80 | March 22, 2021

MAGPADAYON ang pagpatuman sa Provincial Government of Bukidnon (PGB) sa nasugdan nga programa nga gilantaw nga maoy mosulbad sa kapobrehon sa katawhan dinhi sa probinsya, subay sa subling pag-gahin ug pondo alang sa mga programang gihan-ay ubos sa Economic Services sa Pillars of Good Governance ni Governor Jose Ma. R. Zubiri, Jr.

Base sa data gikan ni Provincial Budget Officer Fe Retuertas, alang ning kasamtangang tuig 2021, gipondohan ni Governor Zubiri ug ₱300,000,000 ang libreng corn seeds and fertilizers program ug ₱90,150,000 alang sa maintenance of provincial roads and bridges.

Sa pamahayag ni provincial planning and development coordinator Engr. Jesrel B. Mangubat, EnP nga dinhi usa sa gihatagan ug dakong pondo sa probinsya, ubos sa administrasyon ni Governor Zubiri, sa mga programa nga mopapha sa kapobrehon sa molupyo sa lalawigan, kung aha gisugdan sa tuig 2016 human mahimutang ang Bukidnon sa ika-lima nga pinaka-pobreng probinsya sa nasud gumikan sa nasinati nga taas nga hulaw o El Niňo adtong panahuna. Sugod sa tuig 2016 hangtud karon, gihimong matag tuig ang pag gahin sa pondo sa gobernador, gawas lamang sa tuig 2020 nga mao usab ang pagtunga sa pandemya nga hatud sa COVID-19 diin ang pundo niini gigamit sa pagpalit sa ayudang pagkaon sama sa bugas og delata ngadto na sa tanang katawhan sa Bukidnon.

Gawas sa programa sa libreng binhi sa mais ug abono, gipondohan usab ni Governor Zubiri matag tuig ang pagmintina sa 851.749 kilometers nga kadalanang-probinsyal lakip na ang kinatibuk-ang 6,348.331 ka kilometrong kadalanan sa barangay, sumala sa datus nga gikan sa Provincial Engineer’s Office, nga naghatag usab ug dakong tabang sa mga mag-uuma aron mapadali ang ilang pagpalihok ug pagbiyahe sa mga produkto ngadto sa mga merkado. Nagpadayun usab ang paghatag og pinansyal nga ayuda ngadto na sa 22 ka LGUs sa Bukidnon diin karong tuiga mohatag kini sa ₱25-Million matag usa alang sa ilang priority projects og tag-₱1-Million usab sa 464 ka mga barangay sa Bukidnon.

Gipasabot ni provincial agriculturist Engr. Alson Quimba nga usa kini sa mga contributors nganong nahimutang ang Bukidnon sa ika-lima nga pinaka-labing adunahan nga probinsya sa nasud gikan sa 81 provinces, base sa record sa Commission on Audit (COA) sa tuig 2018 ug 2019 nga COA Audited Financial Report, nga mitala ug ₱15.27-Billion sa 2018 ug ₱18.294-billion nga total assets sa 2019.

Gipasigardo usab sa amahan sa Bukidnon ang bag-ong kalampusan nga nakab-ot karon sa peobinsya human kini maila ug gipakisayud sa Bureau of Local Government Finance (BLGF) nga National Rank 2 ang probinsya sa Highest Nominal Locally Sourced Revenues nga taas ang performance sa koleksyon sa tanang taxes, fees and charges sa Bukidnon, subay sa natakda sa Revenue Code sa probinsya.

Nauna na nga gipadayag ni Governor Zubiri sa iyang mga kaubanang opisyal sa Sangguniang Panlalawigan (SP), sa pagpanguna ni Vice Governor Rogelio N. Quiňo nga prioridad niyang pagatutokan ang pagpadayon sa mga programa ug proyekto nga maghatag-sulbad sa kapobrehon sa probinsya sulod sa iyang nahibiling termino isip amahan sa Bukidnon, atol sa regular session sa SP niadtong Enero 12, 2021.

###