Press Release No. 84 | March 24, 2021

PORMAL nga gipresenta ni provincial health officer Dr. Gary Guido C. Tabios, Jr. ang Vaccination Plan kontra COVID-19 sa hawanan sa Sangguniang Panlalawigan (SP), uban ni Provincial Governor Jose Ma. R. Zubiri, Jr., atol sa ika-83 nga Regular Session nga gipangunahan ni Provincial Vice Governor Rogelio N. Quiño, kagahapong adlawa-Marso 23, 2021.

Sa presentation ni Dr. Tabios, gipasabot niini ang tulo (3) ka mga hugna (phases) nga agi-an sa pagbakuna sa priority population groups for COVID-19 immunization nga mao ang pre-vaccination phase, vaccination phase ug ang post-vaccination monitoring and surveillance phase.

Sa population prioritization, kinatibuk-ang 1,534,256 ang gilantaw nga populasyon sa probinsya sa Bukidnon alang ning tuig 2021, diin ang gibana-bana nga kadaghanon sa populasyon, base sa age group mao ang mosunod: 20 years old and above – 874,286; Adult with co-morbidities – 14,685; Senior Citizen – 112,505; ug ang nahibiling populasyon747,096. Sa maong data, ang eligible population alang sa pagpamakuna sa COVID-19 moabot sa 874,286 ka mga indibidwal o 57% gikan sa projected population sa probinsya, kung aha gilantaw usab sa nasudnong pangagamhanan nga mabakunahan ang 60% sa eligible population. Gipakisayud ni Dr. Tabios nga tungod sa kakulang sa clinical trials alang sa mga nag-edad 18 anyos paubos, dili sila kwalipikado sa kasamtangan nga available vaccines.

Gibutyag sa Provincial Health Officer nga nakaandam na ang probinsya alang sa pagpahigayon sa National Vaccination Program human nga majority sa mga LGUs sa Bukidnon, napahigayonan na sa PHO ug simulation exercise, kung aha giplastar na ang physical setup sa vaccination sites nga halosa anaa sa mga municipal/city gymnasium nga pagapangunahan sa Rural Health Units ug pagadumalahon sa PHO.

Gidayeg ni Provincial Governor Jose Ma. R. Zubiri, Jr. ang nahimong presentasyon ni Dr. Tabios ug wala kini magdahum nga maplastar sa PHO ang vaccination sites sa dili pa matapos ang lugway nga gihatag niini, atol sa naonang pagpatawag kang Dr. Tabios sa SP. Gipasalig sa gobernador nga andam ang pondo kantidad ₱315-Million alang sa maong katuyuan ug gani gipahayag niini nga bilihon ang oras, kumpasan ang pagtrabaho aron nga sa tukmang panahon, hingpit mabakunahan ang katawhan sa Bukidnon sa dili pa mahitabo ang gikahadlokan sa tanan ang subling pagdaghan ug pagtaas sa kaso sa COVID-19, sama sa nahitabo sa Luzon area. Hugot ang hangyo ni Governor Zubiri nga mag-ampo ang matag miyembro sa pamilya alang sa proteksyon sa pandemya nga hatud sa COVID-19.

###