Press Release No. 83 | March 24, 2021

APRUBADO sa Sangguniang Panlalawigan (SP) ang sulat-hangyo ni Provincial Governor Jose Ma. R. Zubiri, Jr. kabahin sa pagtukod sa tulo (3) ka mga Provincial Veterinary Sanitation Checkpoint (PVSC) offices alang sa mga lungsod sa Libona, Talakag ug San Fernando nga adunay kinatibuk-ang kantidad ₱1,095,697.81, atol sa ika-83 nga Regular Session kagahapon-Marso 23, 2021 sa SP Session Hall, Legislative Building, Capitol Compound, syudad sa Malaybalay.

Subay sa nahimong agenda sa SP, ang maong hangyo sa gobernador sertipikado nga dinalian, subay sa hiniusang paningkamot sa Pangagamhanang Probinsyal nga dili makasulod sa Bukidnon ang African Swine Fever (ASF) nga padayong nagahulga sa hog industry sa lalawigan human nga napalibotan na kini sa mga lugar nga naapektuhan sa ASF.

Sa kasayuran gikan ni provincial veterinarian Dr. Nancy V. Diez, ang maong PVSC offices, mamahimo usab nga sleeping quarter sa personahe nga na-destino sa maong mga lungsod, sanglit kadaghanan kanila dili gikan sa mga lungsod nga nanganlan. Gipadangat usab ni Dr. Diez nga padayon ang 24/7 nga pagbantay sa 13 ka mga PVSC stations diha sa mga utlanang bahin sa probinsya, uban sa pag-abag sa kapulisan.

Gipakisayud sa Provincial Veterinarian nga hugot ang ilang pakiglambigit sa mga punong barangay sa Bukidnon, aron pahugtan ang pagpatuman sa Bantay ASF sa Barangay alang sa monitoring sa mga namuhi ug baboy, ingon man ang pagdasig sa pagpalista niini sa Registry System for Basic Sectors in Agriculture (RSBSA), alang sa livestock insurance. Aktibo usab ang pagbantay sa boundary barangays aron masusi gilayon kung aduna ma’y mga simtomas sa ASF ang mga binuhing baboy.

Hugot ang panawagan sa Provincial Government of Bukidnon nga ipadayon nato ang pagka-mabinantayon diha sa mga pagbiyahe sa mga buhing baboy, karneng baboy o ba kaha produkto nga gama sa karneng baboy aron magpabilin nga luwas ang atong probinsya gikan sa ASF. Alang sa padayong pagbantay, i-report dayon kung adunay mamatikdang pagpasulod sa binuhing baboy pinaagi sa hotline numbers sa Provincial Veterinary Office 0917-146-9223 ug sa PGO-Provincial Disaster Risk Reduction and Management Division 0917-765-9016.

###