Press Release No. 90 | March 31, 2021

APROBADO sa Sangguniang Panlalawigan (SP) ang sulat-hangyo ni Provincial Governor Jose Ma. R. Zubiri, Jr. alang sa usa ka panugot nga mosulod sa usa ka kasabutan pinaagi ug taliwala sa Provincial Government of Bukidnon (PGB) ug sa nagkalain-laing lokal nga kagamhanan sa probinsya alang sa ₱55,116,000.00 nga total budget allocation sa pagmintinar sa mga kalsada ug mga tulay sa probinsya alang ning tuig 2021, atol sa ika-84 nga Regular Session kagahapon-Marso 30, 2021 sa SP Session Hall, Legislative Building, Capitol Compound, syudad sa Malaybalay, Bukidnon.

Sa mosyon ni 2nd District Board Member Nemesio B. Beltran, Jr., ang maong sulat-hangyo sa gobernador gi-sertipikahan nga dinalian alang sa mosunod nga mga LGUs: Kibawe (₱3,108,750.00); Dangcagan (₱1,756,800.00); Quezon (₱9,065,700.00); Kadingilan (₱3,717,750.00); Valencia City (₱6,587,550.00); Lantapan (₱2,209,050.00); Cabanglasan (₱6,844,050.00); Sumilao (₱1,808,250.00); Libona (₱6,918,150.00); Manolo Fortich (₱5,395,200.00); Malitbog (₱895,200.00); ug Impasugong (₱6,809,550.00).

Nakalatid sa Memorandum of Agreement (MOA) nga mohimo sa pagpadayon sa pagpatuman sa mga proyekto ang nasangpit nga mga LGUs samtang ang PGB mohimo sa pag-andam sa mga kinahanglanon nga engineering plans, individual program of works, lakip na ang technical specifications ug uban pa.

Sa data gikan sa Provincial Engineer’s Office, ang probinsya sa Bukidnon adunay 851.749 kilometers nga ginamentina nga provincial roads, kung aha adunay gi-alokar nga pondo ang PGB nga ₱150,000.00/kilometer samtang aduna usab 56 ka mga tulay. Base sa Inventory of Provincial Roads as of October 2020, anaa sa 332.256 kilometers ang na-konkretong dalan, 518.258 kilometers ang na-grabahan ug 1.235 kilometers ang na-aspalto nga provincial roads.

Nasayran nga ang nanganlang dose (12) ka mga LGUs adunay kapasidad nga mopadayon sa pagpatuman sa mga proyekto sa pag-ayo o pagmentina sa provincial roads samtang ang ubang LGUs nga wala manganlan makadawat gihapon ug pondo paagi sa private contracts subay sa gitakdang proseso sa gobyerno.

Usa kini sa mga sukaranan nga haligi sa maayong pagdumala sa Pangagamhanang Probinsyal, pinaagi sa pagpanguna ni Governor Jose Ma. R. Zubiri, Jr. aron masiguro ang dali nga paghatud sa mga batakang serbisyo sa katawhan sa tinguha nga mapadali ang pag-uswag ug aron mapalig-on ang seguridad sa komunidad.

Mahinumduman nga alang ning kasamtangang tuig, kinatibuk-ang ₱90,150,000.00 ang gigahin ni Governor Zubiri alang sa maintenance sa provincial roads and bridges, kung aha matag tuig nagahin ug pondo ang Kagamhanang Probinsyal sa Bukidnon alang sa maong katuyuan.

###